Style di biba lekker, style di biba dushi, style di biba bon pasobra mi bida ta dushi, asina ey! Den Janiro Eisden su stem, gewoon un clasico. Aruba, mi ta yega juni, We ready! Pero ban papia mi hendenan, pasobra redo tin, bomboshi, ambiente!

Laga mi cuminsa bisa cu mi no kier papia di politica. Wel, no ta cu mi no kier pero tur hende ta papiando di politica y ta con mi ta haci trece dilanti algo cu ta “refreshing” si full e isla ta den e saus di campaña. Niun hende kier duna mi inside information, mi no tin niun hende pa discuti politica di Aruba akinan na Hulanda, dus ban bisa cu mi ta basa mi opinion riba locual mi ta wak den media local y riba Facebook. Mi no mag skirbi palabra malo den corant, pero mi hendenan, seriously? Que es lo que esta pasando! Wak shelo y bisa “Papa dios, please hinca man” Un caminda entre e acusacionnan contra Paul Croes y Michelle Hooyboer Winklaar su retiro, mi ta supone mi a perde speransa. Acusa mi di ta ‘bias’, pero mi echt tabata pensa they were good ones? Mi ta mi so den e sentimento ki? Ay, ay, ay. Cu bo gusta of no, grita, sapatia, pero Michelle ta e unico persona cu mi por pensa cu nunca a grita den parlamento. E unico cu nunca a perde su compostura durante 8 aña largo. Un dia mi a puntr’e ta con e ta haci ta asina calmo den tur e barbaridad cu ta pasa den circulo politico, e di cu mi “Ay, Yakari, grita ta pa hende cu no sa papia”. Te hasta si bono ta un fan di Hooyboer-Winklaar, bo mester duna cesar locual ta di cesar y nunca mi a wak e ta ataca ningun hende, ni ataca ningun otro politico su famia te hasta ora nan a ataca esun di dje.

Pero bon, nos no ta akinan pa discuti mi admiracion pa Michelle. Y Paul mi amigo? Di team young voters pa team hire trahado ilegal? Kico a pasa? Kico ta pasando?!

Ki dia mi amiga a bisa mi cu e no tin ningun idea pa ken e ta bay vota. E di cu mi “Mi ta bay warda mi wak e debate y despues purba di dicidi”. Personalmente, mi no por pensa riba un solo persona cu lo haya mi voto si mi tabata na Aruba y mi lo por a vota. Ainda e ta duna mi rabia ora mi pensa cu e prome biaha cu mi a uza mi derecho di vota tabata na Hulanda y no na Aruba cual ta e isla cu a duna mi tur cos. Mas tanto mi ta pensa cu e isla completo ta den un estado critico di “hopelessness”. Cu ciudadanonan a give up riba politiconan y manera bo por wak, nan mes ta tuma iniciativa pa yuda unda cu por. Hands for addicts, e comerciantenan di caya grandi, e fundraising nan pa hende den necesidad, CulturAruba digitalisando cultura, etc. Niun hende ta sinta riba nan man mas y esey ta admirabel.
Tiki tiki, nos ta mobilisando nos mesun comunidad y esey ta bunita pa wak. Yena mi cu orguyo, all the way kinan gritando “yes, yes, yes! I see you shinning! Ta mi hendenan!”

Pero na final di dia, ciudadanonan por haci, nos por lucha, nos por yuda pero politica tin su luga den comunidad. Nos ta punta dede riba gobierno pasobra nan tin un compromiso cu nos. E isla mester wordo goberna, leynan mester mehora, decisionnan mester wordo tuma. Nos mester politiconan honesto y consciente cu tin e bienestar di nos isla na pecho. Ta basta di redo, basta di politica sushi, basta di grita otro manera cabrito den parlamento,

Ta basta di drama. E politica bieu y sushi ey no a hiba nos na nada. Mi hendenan, ora di vota por fabor no vota pa un fabor personal, no vota pa bo pida tereno, pa bo negoshi cu bo por habri bou man. Vota pa bo pueblo, pa bienestar general, pa e isla, e comunidad cu lo keda cu bo yiunan ora abo no t’ey mas.