(NLTimes) – Varios studiante riba diahuebs a participa den un manifesticion na Den Haag como protesta contra e sistema actual di lening pa studiante y exigiendo un reforma inmediato.

E marcha a cuminsa desde e ministerio di financia y a caba na e oficina di miembronan di e coalicion VVD y D66, cu e studiantenan urgiendo e proximo Gabinete introduci un educacion liber di debe y mehora e standard riba cual ta funciona actualmente.

“Nos ta kere cu ta importante pa studiantenan por studia sin tin mester di crea un debe asina grandi,” Ama Boahene ken tin 24 aña di edad y actualmente ta cabesante di e union nacional di studiante LSVb a expresa. Mas o menos 800,000 studiante na Hulanda actualmente ta creando un debe cu nan lo mester paga bek, el a declara.

LSVb tambe tin preocupacion pa cu e impacto cu e sistema di lening pa studiante tin riba studiantenan internacional.

“Si studiantenan internacional kier fia placa di Gobierno, nan mester traha un minimo di 56 ora pa luna, cual ta hopi pa un studiante,” Boahene a conta. “E studiantenan aki tambe a ricibi golpi duro, specialmente durante e ciere pa motibo cu nan no por a traha e oranan rekeri mas.”

En particular, e studiantenan ta preocupa tocante e impacto cu e debe aki cu ta keda crece lo tin riba nan salud mental.

“Cada aña di estudio ta un aña di fia for di Gobierno. Mi ta acumulando un debe y mi ta sinti hopi presion pensando riba mi educacion den termino di placa,” Kayliegh Hostede, di apenas 21 aña, cabesante di e associacion di studiante AKKU diRadboud Uniersity na Nijmegen a revela.

Mi tin miedo di wak e suma, pero mi tin un debe di 26,000 euro total te cu aweo,” Hofstede a declara, ken te ainda tin cu cada su carera.

Studiante medico den segundo aña na Universiteit van Amsterdam Luc, tambe di 21 aña, a desahoga su mes contando cu e ta sinti su mes presiona cu hopi stress ora cu e ta pensa riba e debenan cu e tin cu paga. “Ta pa e motibo aki mi ta pensa cu e ta importante pa pone presion politico riba nos gobierno, pero e ta hopi frustrante pa motibo cu niun hende ta tende nos, ni tampoco ta haci nada pa soluciona esaki.”

Estadisticanan di agencia nacional CBS a ilustra luna pasa cu e studiantenan di Hulande tin un debe combina di 24.4 biyon euro na comienso di e aña aki, mirando cu mas studiante a cuminsa un curso na universidadnan.

E cantidad total di studiantenan a amenta cu 7% compara cu aña 2020, y a bira dobel compara cu aña 2015, ora cu beneficionan a ser descarta pa casi tur menos e studiantenan di menos recurso.

E 4 partidonan actualmente deliberando pa forma e proximo Gobierno ya caba a expresa cu e sistema actual di debe di studiante lo ser reforma, y studiantenan kier pa Gobierno trece e cambionan aki lo mas pronto posibel.

Cada dia sin un Gobierno nobo ta costando e studiantenan placa,” segun Pieter van Rossum di 25 aña di edad, ken ta cabesante di e union di studiante na Amsterdam su VU Univeristy. “Tur dia sin un Gobierno nobo ta nifica cu e sistema di prestamo pa studiante actual ta keda prolonga.”