Studiantenan di afo ta trahando hunto cu Universidad di Aruba pa investiga diferente topiconan manera conservacion di rifnan di coral y motivacion pa naturalisa di inmigrantenan, pa asina trece institutonan academico mas cerca na comunidad di Aruba.

Un grupo di studiantenan cu ta participa cu e proyecto di intercambio academico entre Universidad di Aruba y University College Utrecht (UCU) ta enfocando riba diferente area di investigacion cu lo por tin impacto riba comunidad di Aruba.

E proyecto conhunto entre e dos institutonan academico actualmente ta den su di cuater edicion anual, e biaha aki poniendo enfasis riba topiconan cu ta cerca di comunidad, manera e retonan pa negoshinan habri na caya grandi, e efecto di deterorio di nos coralnan pa nos pilar economico y tambe e motivacion tras di aplicacionnan pa naturalisacion haci pa inmigrantenan cu tin algun aña estableci na nos isla.

Bon Dia Aruba a haya oportunidad pa combersa cu e grupo di mas o menos 10 studiante, unda a elabora mas riba loke e studiantenan ta ocupa den nan proceso di investigacion. E resultadonan di con leu a yega cu e investigacion lo wordo presenta riba 19 di april durante un simposio.

Cultura di miedo pa data

Durante nos combersacion cu e studiantenan nan a expresa cu mientras e ta interesante pa haci investigacionnan riba nos isla, mirando cu no tin hopi investigacion cu a tuma luga riba diferente tereno te awo, e ta dificil pa haya acceso na informacion y data cu ta esencial pa haci e investigacion aki. Ademas, e cultura di miedo na Aruba pa organisacionnan comparti data tambe ta contribui na dificultadnan pa por haci investigacion.

Mescos nos a publica un luna pasa, di parti di organisacionnan gubernamental specialmente tin un miedo pa haci data habri. Esaki studiante na Universidad di Aruba Thais Franken tambe a conta Bon Dia. Sra. Franken a colabora cu e studiantenan di e intercambio academico por medio di organisa un charla pa e studiantenan cu recien a sali di nan scol secundario pa asina cuminsa nan carera academico na e Academic Foundation Year. E experiencia aki segun sra. Franken tabata uno sumamente positivo.

Sinembargo sra. Franken a nota cu pa hopi studiante jong tin un miedo pa cuminsa haci investigacion, pasobra posiblemente ta intimida, of sea no tin mucho interes. “Mi ta kere esaki ta pa via cu nos no ta haci ningun tipo di investigacion den scol secundario, cual ta forma un barera grandi ora ta traspasa pa estudio na un nivel mas halto.”

Esaki no ta descarta cu tabatin hobennan cu tabata hopi entusiasma pa haci investigacionnan, segun sra. Franken. E vision cu tanto e organisadonan di e programa como e studiantenan tin pa esaki ta cu ta haci investigacion riba topiconan cu ta haci impacto riba comunidad di Aruba. Pa esaki segun sra. Franken ta interesante pa haya un perspectiva di afo pa tambe pone cabes hunto, mirando cu di parti di Europa e contexto ta varia hopi, pasobra no solamente studiante Hulandes ta participa.

E envolvimento den comunidad ta refleha su mes den e manera con e programa ta curasha hobennan di e facultad AFY pa tambe participa cu investigacionnan cu ta wordo hiba pa e studiantenan den e intercambio.

Pilar economico cultural

Sra. Franken actualmente ta haciendo investigacion pa su tesis riba e posibilidad pa Aruba lanta un pilar economico adicional envolviendo e industrianan creativo manera ofishi, artesania y arte den tur su formanan. E importancia di esaki ta bin pa via di Aruba su dependencia riba turismo, cual ta trece cu ne un urgencia pa diversifica e economia. Sra. Franken lo papia tambe cu entrepeneurnan creativo na nos isla

Dumpnan ilegal

Emma Beroske hunto cu Fabian Timpen ambos ta investigando cu ayudo di Departamento di Naturalesa y Medio Ambiente (DNM) e efecto di dumpnan ilegal riba e subsuelo na Aruba. Esaki ta importante pa por haya sa kico ta e efecto riba e calidad di tera na Aruba pero tambe ki efecto e dumpnan tin riba e criaderonan di sangura cu ta yuda e circulacion di Dengue, Zika y gele koorts. Manera nos a publica recien aunke tin diferente iniciativanan pa cera dumpnan ilegal rond di nos isla, keto bay personanan ta sigui tira sushi den naturalesa sin mira e consecuencianan.

Conservacion di coral y mangel

Emmeline Long actualmente ta trahando riba esfuersonan pa protege mangelnan na Aruba, mirando e importancia di mangel pa e salud di lama. Entre otro sra. Long lo bay compara e tera colecta awendia y compara esaki cu historia documenta di contaminacion di azeta pa asina compronde e impacto di industria di azeta na Aruba. Annemieke Drost di su banda ta trahando pa evalua e salud di Aruba su rifnan di coral. E desaroyo di metodonan pa monitor e status di coralnan na Aruba pa sra. Drost ta sumamente importante mirando cu desde 1970 den Caribe en general e cobertura di coral den lama a baha pa mas cu 80%.

Motivacion pa naturalisa

Pero no ta solamente aspectonan di naturalesa cu ta hayando atencion pa e studiantenan di afo cu a bin pa un tempo Aruba pa traha riba nan tesis. Nora Röders, un studiante di Alemania ta investigando e motivacion cu inmigrantenan tin pa aplica pa naturalisacion. Segun sra. Röders, e polisa di naturalisacion ta algo cu no ta haya hopi atencion, particularmente kico ta e efecto cu naturalisacion tin pa personanan cu ta haya acceso na esaki. E studiante actualmente ta acercando diferente personanan den comunidad cu sea a pasa, ta pasando of nunca a yega di pasa den naturalisacion pa haya un perspectiva mas amplio riba e efecto cu esaki tin riba bida di hende.

Como rekisito pa participa cu e programa aki e studiantenan mester a mustra un interes pa haci un impacto den comunidad di Aruba pa asina mustra e importancia di estudionan academico pa sociedad. Un simposio unda lo presenta e resultadonan di e programa di UA cu UCU ta plania pa dia 19 di april pa 3or di atardi. E studiantenan y facultad ta extende un invitacion pa comunidad pa atende e simposio aki.