(NLTimes)—Casi 30 studiante a organisa un welga riba e trapinan di e Academiegebouw na e Universidad di Groningen (RUG) diaranson, demandando pa mas participacion den e politica di e universidad tocante seguridad social, y e regreso di un profesor cu a wordo despedi recien, segun un declaracion di e studiantenan.

E studiantenan a organisa bou di e nomber “Occupy RUG” diaranson. Den nan lista di demanda, nan a yama pa e regreso di Dr. Susanne Täuber, segun nan a declara den un comunicado di prensa.

Dr. Täuber a wordo despedi di su posicion na e universidad despues di un pleito di hopi aña despues cu el a critica e politica di diversidad di e universidad. El a denuncia e politica di seguridad social na e universidad den varios ocasion den e ultimo añanan.

E disputa entre e profesor y e universidad a cuminsa na 2018 ora nan a nenga Täuber un promocion, aunke el a bisa cu e ta cumpli cu e criterionan. E ora el a skirbi un articulo pa critica e programa di Rosalind Franklin di e universidad. El a declara cu e programa, destina pa permiti hende muhe aplica pa posicionnan academico specifico, a causa discriminacion y trato desigual.

“Coleganan masculino semper a bisa mi cu mi tin mi trabou djis pa via di e programa. Nan a nenga mi un promocion. Pues indirectamente, un programa asina ta stroba of te hasta destrui carera di hende muhenan,” el a conta RTL. E universidad a pone presion riba Täuber pa denuncia su articulo despues cu esaki a wordo publica. Despues cu el a nenga, RUG a considera e situacion como un “abuso di confiansa ireparabel,” y e universidad a bay busca permiso na corte pa kit’e f’ey trabou. E dispidimento di Täuber a sosode durante un protesta riba Dia Nacional di Hende Muhe, manera Dagblad van het Noorden a reporta.

Desde su dispidimento, coleganan y studiantenan a uza e hashtag #AmINext riba rednan social pa expresa nan disgusto cu e decision di e universidad. Un peticion pa e regreso di e profesor a garna casi 3.700 firma, mientras cu un campaña pa recauda fondo a inicia un siman pasa pa yuda e profesor cu su gastonan legal.

E demandanan oficial di e protestadonan tambe ta inclui e implementacion di politicanan mas specifico pa asina preveni discriminacion y abuso, y tambe pa crea un medio ambiente sigur pa reporta incidentenan asina.

E protestadonan a haci esfuerso pa keda keto pa no stroba discusionnan di tesis doctoral cu ta tumando luga den e edificio, segun un cuenta di Instagram crea pa e protesta.

E welga a sigui te pasa di 6or di anochi, sin fin. E universidad a bisa cu e ta habri pa discuti preocupacionnan tocante seguridad social cu e studiantenan. Pero un vocero a conta ANP cu nan no por a confirma si e universidad lo puntra e studiante pa bay. “Nos mester warda y wak.”