(AP) – Studiantenan den provincia Aceh di Indonesia a campana diaranson exigiendo gobierno tuma medida contra e refugiadonan Rohingya yegando via boto den cantidadnan cu ta keda aumenta, mientras polis a nombra mas sospechoso di contrabanda di hende.
Mas di 1,500 Rohingya, kendenan a huy for di atakenan violento na Myanmar, awo saliendo for di campnan na Bangladesh den buskeda di un miho bida, a cuminsa bay Aceh via Sumatra desde november. Nan a ricibi hostilidad for di otro Musulmannan na Aceh.
Mas o menos 200 studiante a protesta dilanti parlamento provincial na Banda Aceh, capital di e provincia, pa haci un yamado na legisladornan pa rechasa e refugiadonan Rohingya, bisando cu nan presencia ta causa problema social y economico den e comunidad. E manifestantenan a grita “Bay di aki Rohingya!” y a critica gobierno ademas di agencia di refugiado di Nacionnan Uni pa nan fracaso den maneha e yegada di refugiado. Algun di nan a te hasta kima taira riba caya. “Nos ta urgi parlamento tuma accion firme inmediatamente pa saca tur refugiado Rohingya for di Aceh,” Teuku Wariza, organisador di e protesta a declara.
E manifestantenan a marcha na un centro di comunidad local na Banda Aceh, unda mas o menos 135 Rohingya tabata kedando. E manifestantenan a saca nan paña y nan pertenencia, forsando autoridadnan reloca nan na otro shelter. Indonesia antes tabata tolera e refugiadonan mientras cu Thailand y Malaysia tabata saca nan. Sinembargo e hostilidad aumentando for di algun di e Indonesnan pa cu e Rohingya a pone presion riba president Joko Widodo su gobierno pa tuma accion. Widodo anteriormente e luna aki a bisa cu gobierno ta sospecha un aumento den contrabanda di hende pa cu e aumento di yegada di Rohingya.
Polis na Banda Aceh riba diaranson a nombra 2 otro persona sospecha di ta contrabandista di Bangladesh y Myanmar despues di e yegada di un boto di refugiado dia 10 di december. Un di nan, e capitan ken tambe ta un refugiado, a ser acusa di contrabanda di hende. “E no ta un problema facil, esaki ta un problema cu desafionan grandi,” minister di Exterior, Retno Marsudi a conta reporteronan. “UNHCR a reitera su compromiso pa sigui asisti gobierno di Indonesia den atende e situacion aki.
