(NLTimes) – Studiantenan di scol na Hulanda ta usando e generador di texto di inteligencia artificial ChatGPT pa haci tur tipo di huiswerk sin cu nan maestronan ta ripara, NOS a reporta despues di a papia cu varios studiante.

Mas di 250 a bisa cu nan a haci uso di e robot di inteligencia artificial pa caba tareanan di scol y den casi tur caso, nan no a ser gara pa e docente. Studiantenan ta haci uso di ChatGPT pa contesta partinan di e pregunta, skirbi relatonan, crea reportahenan, kita erornan den e gramatica di nan texto y te hasta crea ideanan. Hopi biaha nan ta usa esaki pa tareanan pa e idioma Hulandes.

Un studiante di e tercer grupo den HAVO a conta NOS cu e ta haci uso di e herment aki tur ora. “Mi ta usa e robot pa rapidamente caba mi huiswerk,” el a comenta. “Hopi biaha e ta bisa den un opdracht cu nos mester describi of contesta den nos mesun palabra. Eora un docente no por verifica exactamente cua mi propio palabranan ta.”

Otro studiante ta usa ChatGPT pa copia su amistadnan su huiswerk. Nan huiswerk ta drenta e sistema y ChatGPT ta genera un version nobo cu e mesun contenido pero cu diferente palabra. Un grupo di 4 studiante den VWO a conta e noticiero cu el a haci uso di e robot pa su analisis di poesia. “Segun e opdracht, mi mester a duna mi propio opinion. Chat GPT no ta hopi bon den esaki ainda, mi mester a bolbe skirbi e contesta, sinembargo e parti teoretico tabata bon y mi por a copia esey manera e tabata.”

Docente di Nijmegen Furkan Sogut ta hopi preocupa pa cu esaki. E ta duna les di Hulandes, un di e materianan pa cual e studiantenan ta usa ChatGPT. “Mi no kier asumi e mal intencion di e studiantenan, pero mi no por mira si nan a skirbi algo nan mes.” E deteccion actual contra copiamento, cual ta check pa textonan identico den reportahenan entrega pa otro studiantenan of online no ta hopi efectivo contra ChatGPT pa motibo cu e robot aki ta genera e texto su so.

Segun Sogut, e ta esencial pa e studiantenan skirbi nan mesun texto pa asina e docentenan por husga si nan tin un bon dominio di e lenguahe. “No si ChatGPT tin un bon dominio di Hulandes.”