Mañan mainta na Universidad di Aruba, studiantenan di Universidad di Aruba ta bay tin e oportunidad di participa den e consulta tocante e proyecto di ley pa loke ta trata Derecho di Naturalesa.
E evento aki ta bay tuma luga na Aula di Universidad di Aruba for di 10 or di mainta te cu 12 or di merdia.
Mientras tanto, e proceso di consulta ta continua online, unda ta permiti na esnan interesa pa revisa e propuesta di ley di Derecho di Naturalesa y comparti nan opinion y sugerencianan pa medio di e formulario disponibel riba www.publico.aw/consulta/ . E feedback colecta lo yuda duna forma na un ley mas robusto y efectivo.
Pa fomenta un nivel mas amplio di participacion y transparencia, e ultimo dia pa entrega feedback a ser extendi te cu dia 21 di april, dunando e comunidad mas oportunidad pa aporta na e desaroyo legislativo.
E fecha di 21 di april ta un dia prome cu e celebracion di dia di mama tera, y ta marca un aña desde cu e iniciativa legislativo aki a ser entrega.
Bao liderazgo di minister Ursell Arends, encarga cu proteccion di naturalesa, a inicia un serie di sesionnan di consulta publico encuanto e introduccion di Derecho di Naturalesa den nos constitucion. E esfuersonan aki ta refleha un paso grandi den e reconocemento y proteccion di e derecho fundamental di naturalesa pa existi y prospera.
E sesionnan di consulta a tuma luga e ultimo dos siman cual a inclui participacion di e publico en general, gremionan comercial, abogado, y hues, conhuntamente cu Directie Natuur en Milieu.
Durante e sesionnan a discuti cada articulo di e proposicion di ley detayadamente, colectando e punto di bista y sugerencianan di participantenan. A enfoca riba dialogo abierto y pa asina ricibi feedback constructivo.
Minister Arends a pone enfasis ariba e importancia di inclui un variedad di gruponan di interes den e proceso di desaroyo di e ley, sigurando cu e legislacion final ta representativo di e deseo y necesidad di e comunidad di Aruba.
E iniciativa aki ta mas cu legislacion; e ta un declaracion di nos compromiso colectivo pa respeta, proteha, y trece naturalesa y desaroyo den balans pa nos pais,” segun minister Arends.
Reconocemento di derecho di naturalesa den Constitucion di Aruba
E proposicion di ley aki ta trata di reconocemento di dos derecho fundamental cu ta conecta na otro, den Constitucion di Aruba:
E derecho di hende pa por biba den un ambiente limpi, saludabel y sostenibel;
E derecho di naturalesa, tanto na tera como na awa, riba proteccion, conservacion y restauracion di su ecosistema y biodiversidad, y pa regenera su ciclo di bida, structura y funcion.
