(NLTimes) – Studiantenan di Technical University of Delft a establece un record mundial nobo fin di siman pasa.
Nan a mira exito cu nan vehiculo di hidrogeno cual a core 2,488.4 kilometer den 3 dia sin mester di bolbe yena e tanki. E logro aki, cual ta sumamente remarcabel, e ser logra cu solamente un kilogram di hidrogeno.
Guinness World Records a oficialmente reconoce e logro aki, marcando esaki e distancia mas largo cu a yega di core cu un vehiculo di hidrogeno sin mester bolbe yena e tanki.
E vehiculo en cuestion a ser diseña pa e ekipo EcoRunner di Delft University of Technology. E ekipo, cual ta consisti di 24 studiante, a dedica henter un aña na diseña, construi, test y core loke nan tabata spera lo bira e vehiculo di hidrogeno mas eficiente den mundo.
E ekipo a introduci e vehiculo na mundo pa prome biaha den mei di aña 2023. E ta un vehiculo eficiente cu ta extremadamente compacto, tiki pisa y aerodinamico cu ta core riba hidrogeno. E vehiculo aki ta converti e hidrogeno den energia electrico, cu vapor di awa y calor como e unico productonan cu ta crea door di e proceso aki.
Pa minimalisa e vehiculo su peso, e studiantenan a opta pa construi cierto partinan tipicamente crea pa STEEL di fibra di carbon na luga di esaki. Como consecuencia di esaki, e vehiculo ta pisa solamente 72 kilogram y por yega na un velocidad di 45 kilometer pa ora.
Segun comunicadonan di prensa, e record anterior tabata di 2,055.7 kilometer. Pa kibra e record aki, 11 chauffeur a tuma turno nabegando e mesun caretera di 5 kilometer den turnonan di 2 ora, cu un total di 71.5 ora ta stuur anochi y den dia. “E tabata bira hopi laaf, pero nos a traha como ekipo pa mantene nos mes ocupa y entreteni,” TU Delft su studiante Kaatje Bout a conta NH Nieuws. E evento a tuma luga na un circuito na Alemania.
