Ta importante pa reconoce cu desaroya habilidadnan riba nivel social y emocional ta yuda mucha siña miho. Esaki ta locual Social Emotional Learning and Development, SELD un modulo importante den estudio di pedagogia ta mustra. Y Instituto Pedagogico Arubano, IPA, studiantenan di tercer aña por scoge e estudio aki cu ta dirigi na siñamento na nivel social-emocional.
Y na final di nan modulonan, e grupo a tene presentacionnan diverso na un grupo selecto for di e area di enseñansa riba e tema aki. E studiantenan durante e presentacionnan den Sala Madonna di IPA, a bisa cu SELD por duna un contribucion grandi na bon resultado escolar. Esaki ta conta pa tur alumno y studiante, for di nivel di scol preparatorio te na scol secundario y enseñansa superior.
Esaki ta pasobra e forma di traha for di e salida pedagogico-didacto pa cua SELD ta para pe, ta yuda alumnonan pa desaroya nan habilidadnan na nivel emocional y social, segun e docente encarga Leontien Merkies. “Asina nan ta siña pa den situacionnan emocional dificil haci escogencianan optimal cu na final ta sali bon pa nan mes y pa otro. Pa medio di SELD, hobennan ta siña kico ta pasa si nan ta experiencia nan emocion y con nan por anda cu nan na un manera mas efectivo. E habilidadnan aki por ehempel ta yuda si un alumno tin pensamento negativo di su mes of pa otro. E hoben ta siña pa domina su mes y scoge pa un comportacion cu ta positivo pa tur.”
Pa e minor aki, a sigui cuater diferente programa di SELD, cu ta Conscious Discipline, Positive Action, PATHS (Promoting Alternative Thinking Strategies) y Mindfulness. Tur e programanan aki ta dedica atencion na regulacion propio, pensamento creativo y critico, con pa soluciona problema, colaboracion y comunicacion y habilidadnan social y cultural.
Den e programa di Gobernacion entre MEP y Raiz a palabra cu enseñansa mester dedica atencion na siñamento social-emocional. Pa tal motibo mes, e plan di maneho pa enseñansa 2021-2025 ta bisa cu scolnan no solamente mester traha riba cualificacionnan basico di alumnonan pa por haya un trabou, pero cu enseñansa na Aruba mester ta inclusivo. Esey ta nifica cu cada alumno ta conta. Consecuentemente, e ta nifica cu mester pone mas atencion na e socialisacion di alumnonan, segun IPA.
