Awe ta dia Internacional di Derechonan di Much,a na unda cu scolnan rond di e isla a cuminsa celebra for di un par di dia caba, pa asina muchanan pasa un rato dushi na scol of otro caminda y celebra nan dia y nan derechonan.
Pa cu esaki, Scol Caquetio a dicidi di duna na su studiantenan un dia VIP na Renaissance Convention Center na unda for di mainta te cu merdia nan a haci varios actividad pa conmemora e dia aki hunto cu juffrouwnan y assistentnan di klas.
Rosanne Croes miembro di Comision di Derechonan di Mucha di Scol Caquetio a expresa cu for di algun dianan pasa nan tabata planeando kico pa haci cu e muchanan pa e dia aki, el a splica cu manera nan ta haci na scol tur dia nan a cuminsa haci papia tocante balornan na unda cu di un manera creativo assistentnan di klas y studiantenan a comparti un rato diferente na hotel y di e forma ey tambe siña comparti tur hunto.
“Esey ta hopi importante pasobra na nos scol nos tin e balor cu ta famia y eynan nos ta sinta akinan manera un famia y disfrutando di un bunita show”, Croes a sigura.
Lisenne Lopez di Comision di Derechonan di Mucha tambe a comenta cu entre e programa di actividadnan nan a haya e comedia di un maestro, un baile di grupo 3 y 4 y pa finalisa nan a haci un oracion pa gradici tur loke nan a haci e dia di ayera y bay scol back.
Genesis Geerman studiante di grupo 7A a comenta cu el a pasa un dia hopi dushi cu loke juffrouw Croes y Lopez a organisa pa tur muchanan di scol aki pa celebra nan dia di mucha cu pa nan ta hopi importante.
“Ma gusta e dia pasobra ta full over di nos y esey ta hopi special pa nos, nos a pasa really great cu tur nos amigonan “Raiza Asagi di klas 4 a señala.
