Mediante un carta cu studiantenan di John Wesley College MAVO di San Nicolas a manda na minister encarga cu Enseñansa, Endy Croes -di e cual Bon Dia Aruba tambe a haya acceso na dje- nan ta trece dilanti nan preocupacion pa e posibel ceramento di scol aki y ta haci un suplica na minister Croes pa por fabor papia cu nan prome tuma un decision final.

“Nos ta miembro di conseho di alumno SMAD, Students Making A Difference. E aña aki nos a cuminsa cu e conseho di alumno aki, pa asina nos tambe tin un bos den nos educacion. E motibo di e carta aki ta pa demostra nos punto di bista pakico e scol no mester cera e scol.

Nos preocupacion ta cu nos ta sinti nos mes na cas y porfin nos por a adapta un caminda. E cos mas grandi dicon JWC no mester cera ta cu e docentenan t’ey pa bo ‘no matter what’. Nan ta hasta keda despues di scol, den nan ora liber, pa duna nos extra les. Nos ta haya hopi erg cu niun hende a papia cu nos, pone interes den nos, nos tambe tin derecho. Nos, como SMAD, a scucha tur e alumnonan nan preocupacion. Siguientemente Sr. Croes por lesa tur e puntonan di preocupacion cu nos a haya cu nos scol no mester cera.” E documento ta bisa.

Nan ta sigura cu nan como scol chikito ta un ekipo, un famia, nan a crea diferente red social pa asina scol por haya mas alumno ya cu schoolgeld ta halto (entre 650 pa 700 florin pa aña) y no tur mayor tin e capacidad financiero pa paga e suma aki.

Alumnonan ta haya lesnan na idioma Hulandes y e scol aki a cuminsa 63 aña pasa na San Nicolas, na e momentonan aki ta conta cu 62 mucha como studiante.

“E amor cu nos ta haya di docentenan ta net amor cu nos falta, cu nos no ta haya na cas, p’esey pa hopi di nos e ta un scol y nos cas”, alumnonan ta sigura.

Nan tampoco ta di acuerdo pa cambia e nomber di scol si esey ta den e plannan, loke nan ta pidi ta pa scol aki por keda habri y nan keda hunto, “nos ta willing pa haci kico cu ta, manera nos ta haciendo caba pa mantene nos scol habri, pone nos bou di DPS pero por fabor no cambia nos docentenan cu tin un bon vision pa nos scol y pa nos alumnonan, nos ta haya hopi erg cu atrobe nan ta kita algo for di nos, San Nicolas, dicon Playa semper ta haya kico nan kier?” e representante di e alumnonan ta señala den e carta.

Redactor di Bon Dia Aruba ayera atardi a haya sa for di un fuente cu alumnonan mester a rectifica e carta aki debi cu esey no a cay den bon tera pa e bestuur y nan a haci un otro carta, redactor di Bon Dia Aruba no a logra haya e carta te ciere di edicion aki.

Igualmente nan a informa cu hunto cu docentenan nan a plania diferente actividadnan pa scol como opendag, jobfair y meedraaidag pero tur esey a keda cancela, “pasobra SPCOA a dicidi esey,” nan a bisa.

Riba red social tambe un usuario a publica un post den cual ta indica cu pa motibo cu for di par di añanan e alumnonan ta birando menos y e schoolgeld mucho halto, esey a conduci na tuma e decision aki, ayera den oranan di atardi bestuur a convoca na un reunion cu mayornan unda no tabata permiti e presencia di e alumnonan pa asina papia tocante e futuro di e muchanan y docentenan of un posibel solucion pa esaki, e fuente a bisa cu esey por a convoca den un pleitamento y p’esey a dicidi pa alumnonan no ta presente.

E fuente tambe a sigura cu for di aña pasa scol a haya un cambio di directie y cosnan a cuminsa cambia, pero for di 2017 e cantidad di alumnonan ta bahando y segun a sigura, finanzas no por carga e peso aki, si esaki ta berdad, pakico si e bestuur a ripara cu e cosnan ta bayendo malo nan no a haci nada? Ademas di esey, mayornan aki no tin nada di haber cu loke tabata pasando na aña 2017.

Igualmente redactor di Bon Dia Aruba a tuma contacto cu minister di Enseñansa, Endy Croes, pa haya mas informacion di e situacion incomodo aki cu tanto alumnonan como maestronan y mayornan ta bibando, kico ta bay pasa cu e maestronan, si nan ta bay keda cas sinta y cobra? kico ta bay pasa cu e alumnonan? kico ta e motibonan di ceramento di scol? si esey ta e caso. Kico bestuur a haci pa promove e scol aki? Dicon no cera e portanan di graf von zinzedorf basisschool di biaha? Dicon mayornan lo pone nan yiu riba un basis school caro si despues no tin un vervolg school pa nan bay? Minister tin pensa di reuni cu e muchanan y maestronan pa splica e situacion aki?

Un di e posibel solucion cu a wordo presenta tambe pa bestuur ta si gobierno ta di acuerdo pa adapta e scol pa tres aña pa wak con e ta bay, esaki ta keda den man di minister Croes.

Te ciere di edicion aki redactor di Bon Dia Aruba no por a haya contesta.