Studiantenan di examenklas a haya nan resultado!

Ayera tabata un dia yena cu hopi ya cu hopi studiante a haya nan resultado y a celebra den grandi. Awor e hobennan aki ta cla pa sigui cu nan plannan pa futuro. Bon Dia Aruba a bishita algun scol y a experencia e momento cu studiantenan a haya sa nan resultado final.

Nos redaccion a tuma e oportunidad di papia cu algun persona pa asina tin un miho bista di e resultadonan. Vocero di Colegio Arubano Zaida Everon a duna nos e resultadonan di e scol den prome rond y ta lo siguiente : HAVO -53%, VWO 65%. Sra. Everon ta splica cu esaki por cambia den e di dos rond unda cu muchanan lo bay bek pa ‘herexamen’.

For di Juliana School nos a papia cu nan directora Paula Croes kende ta splica cu e ta hopi contento cu nan porcentahe e aña aki. Den total nan porcentahe cu a slaag ta 80% cu a slaag y compara cu aña pasa e cifranan tabata relativamente mescos cual ta haci nan hopi orguyoso. E directora ta sigui splica cu e aña escolar aki tabata uno pisa pa Juliana como cu nan a muda october aña pasa pero asina mes a caba cu bon resultado y ta wardando pa resultadonan di nan herexamennan. Na La Salle Colege nos a papia cu Dolores Thiel cu ta e coordinador di examenklas. Sra. Thiel a bisa cu den prome instancia a resulta cu 71% a slaag y ainda falta algun mucha pa haci examen sea ta paso nan tabata ausente of paso nan mester pasa e herexamen y cu esaki ta spera di subi e porcentahe y yega casi 80%.

Bon Dia Aruba a probecha pa papia cu algun studiante pa asina haya mas informacion di nan banda. Valery  kende ta studiante di La Salle College ta contento con su examen a bay e aña aki y cu solamente scheikunde e no a gusta con e la bay pero e la logra. Valery a cuminsa prepara pa su examen un luna prome cual a pone cu e la logra. Awor su siguiente paso ta EPI y despues caminda pa Hulanda.

Na colegio nos tabata tin e honor di papia cu nan “Beste Geslaad” di VWO V6 Roderick. Roderick ta sinti contento di a sali e miho ya cu e la traha hopi duro pe. Su plan ta pa bay studia na Merca y logra su master. E la conseha tur esunnan cu no a slaag pa traha duro y no des motiva.