Diabierna mainta, studiantenan di Colegio Arubano a tene un protesta ariba tereno di scol caminda nan a protesta ariba e reglanan nobo cu scol a introduci pa locual ta trata e vestuario di e muchanan; y e grupo di hoben a entrega un carta oficial na e con-rectornan di e scol.

Den un combersacion cu un di studiantenan di Colegio Arubano cu a participa den e protesta, e ta splica e motibo pakico nan a protesta y tur e puntonan cu nan a trece pa dilanti den e carta entrega.

Segun e studiante, cu a pidi pa keda anonimo, ta splica, dialuna 13 di september e scol a cuminsa manda muchanan cas back pa cosnan chikito cu tabata robes den e vestuario di e muchanan. Pa e studiantenan e reglanan nobo aki no a wordo treci pa dilanti den un manera cu no tabata suficientemente cla pa nan ya cu e scol no a avisa e studiantenan cu e reglanan aki lo wordo introduci

“Scol tabata haciendo di mas, bo por hasta bisa cu e ta abuso di poder pasobra nan ta manda mucha cas pa cosnan chikito. Nan ta manda mucha cas y tin mucha ta biba te na Noord of na San Nicolas, tin mucha ta cana bin scol of nan ta bin cu bus y nan por perde dos pa tres lesuur djis pa bay cambia paña, nan ta perde oranan valioso di scol”, el a agrega.

E studiantenan a cuminsa colecta firma desde diamars y a logra colecta 923 firma, cual ta 65% di e studiantenan di Colegio Arubano. E ta splica cu nan mester a colecta mas tanto firma posibel pa asina e carta cu a nan a entrega por ta valido y tambe pa demostra cu un porcentahe hopi grandi di e scol ta contra di e reglanan nobo.

Segun e studiante a indica, hopi docente a demostra apoyo pa nan causa E grupo di studiantenan cu a protesta a haci e peticion na tur studiante cu a participa den e protesta pa bisti na blanco, y hopi docente a presenta na scol cu uniform blanco tambe, cu e ta bisa ta pa mustra apoyo na nan.

E grupo di studiante a entrega un carta oficial na e con-rectornan di e scol, ya cu e rector mes no tabata presente. Den a carta aki e studiantenan ta expresa cu nan no ta di acuerdo cu locual scol ta haciendo, cambiando e reglanan tur aña, mandando e muchanan cas back si nan tin algo robes cu nan vestuario y sobretodo, nan ta expresa nan disgusto pa cu e manera cu nan a informa nan di e reglanan nobo y cu nan ta e studiantenan den consideracion.

E studiante aki ta splica cu nan meta ta pa e bestuur di Colegio Arubano scucha e cambionan chikito cu nan lo desea di haci na e reglanan di vestuario di scol y cu nan lo haci e cambionan aki. “Loke nos kier logra ta cu nos como studiante ta wordo inclui den e decisionnan cu ta afecta nos directamente, paso na final esunnan cu ta wordo afecta ta e studiantenan mes”, el a bisa.

El a agrega tambe; “Nos ta haya cu scol ta perde mucho tempo controlando e paña di e studiantenan, en bes di por ehempel manda CP y SE rooster na tempo. Buki di CP no ta cla, CP y SE rooster ta wordo manda un siman prome y nos ta haya cu scol por enfoca mas ariba e cosnan ey pa mehora nos educacion, pa nos tin miho enseñansa enbes di perde asina hopi tempo ta controla e pañanan di e muchanan mainta”.