(NLTimes) – A pesar di e ciere completo implementa riba diasabra, miles di studiante nacionalmente na Hulanda mester sigui atende scol e siman aki pa tuma examen.
Studiantenan di Amsterdam ta frustra cu e universidad no a pospone nan examen of cambia na tuma esaki online. Nan ta preocupa cu nan lo infecta cu coronavirus poco prome cu e celebracionnan di Pasco, NH Nieuws a reporta.
Segun e noticiero regional, algun facultad di universidad di Amsterdam (UvA) tin te hasta 1,000 studiante reuni den un edificio pa tuma nan examen. Mientras e sala pa tuma examen ta tene cuenta cu distanciamento social, e studiantenan ta aglomera pafo di e sala y/of na nan locker.
“Mi tin miedo di infecta asina cerca di Pasco,” studiante di ley Meira a bisa e noticiero. “Pa e motibo aki mi ta lagando e examen aki pasa. Mi lo sufri un retraso den mi estudio. Mi ta kere cu Universiteit Van Amsterdam no ta tumando responsabilidad aki.”
Studiante di ciencia politico Erik Sjoers a reuni 3,300 firma den un peticion contra atendencia obligatorio pa examen di universidad, pero mayoria di examen te ainda ta ser teni den persona na e universidad. “Mi tin miedo cu si fisicamente nos pone hopi studiante den e mesun klas, nan lo infecta cu e virus y hiba esaki cas na nan famia como un regalo di Pasco,” el a expresa na NH Nieuws.
Universiteit Van Amsterdam ta a pone den plan opcion di bolbe tuma examen pa preveni mas retraso den estudio si studiantenan mester keda den cuarentena durante e examen. Pero pa varios studiante, e ripiticionnan aki ta coincidi cu examen pa otro materianan segun e noticiero.
E universidad a conta NH Nieuws cu hopi studiante ta contento di por tuma nan examen na e universidad. “Nos ta tuma extra precaucion, manera control di uso di tapaboca y desinfecta man prome cu drenta.”
