Ayera merdia, un grupo di studiante di Facultad di Ley di Universidad di Aruba a dicidi di tene un protesta pasivo como sosten na e docente mr. dr. Ryçon Santos do Nascimento, ken segun nan mes a sigura, Universidad di Aruba no tin ningun motibo pa retira di su funcion.
Gerick Croes, master studiante di facultad di Derecho di Universidad di Aruba, a declara cu nan como studiante kier pone un enfasis cu ayera nan a haci uso di nan derecho como ciudadano pa expresa nan opinion, preocupacion y alabes nan sentimento.
Di esaki el a señala cu nan ta espera cu den un comunidad democratico cu ta respeta su mes lo no tin ningun tipo di repercusion contra ningun studiante cu a dicidi di uni e protesta aki.
Asina mes, el a bisa cu Universidad di Aruba ta e cas pa desaroya futuro profesionalnan, pero accionnan cu ta tumando den relacion cu e posibel retiro di e docente Santos Do Nascimento ta mustrando lo contrario.
Loke nan tabata kier demostra ta e balor cu e docente tin pa su studiantenan y e balor cu tin pa Universidad di Aruba mes. Santos Do Nascimento ta docente di staats en bestuur recht y nan como studiantenan di Derecho, tin solamente notanan positivo di dje pa trece dilanti.
“Ryçon su envolvimento cu e comunidad di Aruba ta notabel den tur aspecto” Croes a manifesta, asina tambe a duna di conoce cu Santos Do Nascimento a conseha Parlamento di Aruba y hasta Gobierno relaciona cu geschillenregeling den reino.
Cristian Soto Garcia, ken tambe ta studiante di Ley, a trece dilanti cu e ta un docente cu for di comienso di su carera ta causa un impacto positivo riba mayoria di studiante.
Asina mes, Soto Garcia a señala cu nan ta haya ‘jammer’ con e situacion ta canando y nan mes cu a scucha rumor. Ta tristo cu scol mes no a duna di ningun manera e intencion concreto di locual nan kier haci y tampoco splica kico e problema real ta. Pa nan como studiante esaki ta nifica un escenario un tiki fastioso, pa motibo cu Santos Do Nascimento ta nan docente directo cu ta motiva nan y kende nan ta aprecia.
“Nos ta pidi autoridadnan di universidad pa reconsidera locual nan kier haci pa no perhudica nos como studiante y alabes perhudica yiu di tera”, Soto Garcia a sigura.
Di loke ta trata e motibo di retiro, Bon Dia Aruba a puntra si ta berdad cu nan ta pensa cu ta existi persecucion politico relaciona cu retiro di e docente Santos Do Nascimento. El a contesta cu nan no sa si esey ta berdad. Di su banda e no ta pensa cu esaki tin di haci cu politica.
Na luna di december ultimo, studiantenan a manda un carta pa minister di Enseñansa, Armando ‘Rudy’ Lampe y rectorado di universidad tambe a ricibi e carta ey. Nan a ricibi contesta pa e carta bisando cu nan lo tin den consideracion e deseonan di studiante.
“Den papel nan a pone esey, pero e intencion cu nos ta ripara ta diferente”, el a aclaria.
For di e momento ey, te ainda nan como studiante no sa actualmente cua ta status di e docente den universidad y Soto Garcia a afirma cu loke nan a compronde ta cu Santos Do Nascimento a ricibi un pakete, pero esey no ta confirma te ainda.
Di otro banda, docente Ryçon Santos do Nascimento a ofrece su declaracion pa e medionan local, den cual el a expresa cu e problema a cuminsa na 2016 ora el a promove riba su Proefschrift Koninklijk Onsluierend na unda un profesor di dje a duna recomendacion pa e por haya e puesto di Hoofd Medewerker.
Un posicion similar cu segun e mes a sigura, e rector mes a yud’e den training pa haya e funcion. Pero na final e rector a cambia e maneho, mustrando cu esaki ta un exigencia di Senior Kwalificatie Onderwijs (SKO).
Santos Do Nascimento a agrega cu locual rector di universidad a haci ta cu el a aumenta e exigencianan pa e posicion, di un manera cu niun hende por haya na e luga aki cu ta cumpli cu e rekisito. Asina mes el a declara cu ningun di hefe di empleado ta califica pa e funcion aki.
Ademas, Santos Do Nascimento a entrega un keho pa minister di Enseñansa y a base di e peticion ey, el a confirma cu universidad kier impone diferente castigo disciplinario, bisando cu locual el a bisa ta un mentira.
Igualmente, el a declara cu en bes di bay riba contenido, tabatin diferente forma pa menasa Santos Do Nascimento cu medidanan ta bin.
A puntra si e situacion aki tin di haci cu aspecto politico y el contesta cu den su combersacion cu Lampe e no a haya cu minister ta presiona universidad. Lo cual si ta berdad ta cu rector ta presiona Santos Do Nascimento pa tuma distancia for di Partido AVP, na cual e ta duna cursonan y organisa eventonan pa aumenta e participacion democratico, segun el a expresa.
“Mi no mester pidi permiso pa mi libertad politico ni pa mi por vocifera mi opinionnan, pasobra esey ta mi derecho fundamental”, el a bisa.
Asina mes, Bon Dia Aruba a haya contacto cu rector di Universidad di Aruba, Glenn Thode pa conoce e otro banda di e medaya. El a declara cu tin un proceso andando den e relacion entre dunado di trabou (Universidad di Aruba) y un trahado specifico (sr. Santos do Nascimento). Algun studiante anteriormente tambe a laga sa pa medio di carta cu nan ta contento cu e docente.
“Como Universidad nos a laga e studiantenan sa cu nos lo tene cuenta cu nan interesnan y opinion”, Thode a manifesta. Mientras e proceso den e relacion laboral ta andando, como dunado di trabou responsabel, nan no ta haya corecto pa drenta den detayenan di e proceso aki. Si despues cu e proceso ta tras di lomba lo ta necesario ainda pa splica e proceso den mas detaye y esaki lo ta corecto, Universidad di Aruba lo haci esaki.
