Studiantenan cu a core stage na Belgica y Irlanda a conta nan experiencia

Ayera mainta na Colegio EPI a tuma luga un conferencia di prensa na unda studiante- y docentenan cu a biaha recientemente pa Belgica y Irlanda pa un biahe di stage, a conta con e biahe aki a bay, kico nan a siña y e importancia y meta di e experiencia aki.

E biahe aki, Rachelle Goedgedrag, Central Decaan y vocero di Colegio EPI, a indica cu e proceso aki di e biaha cu Erasmus+ a cuminsa na 2020, pero pa motibo di e pandemia no por a finalisa esaki na mesun aña, pero aworaki tres aña despues a logra finalisa y realisa e biahe.

Studiante Shirley Acosta, studiante di unidad di economia a conta cu el a core su stage na Belgica na GO Scholengroep Dynamiek na un oficina cu ta administra diferente scol na Belgica. “E experiencia tabata hopi bon, unico. E tabata un tiki desafiante, pero el a bay hopi bon. Ta garantisa cu mi a habri hopi porta pa otro studiantenan y mi ta spera cu otro studiantenan tuma e oportunidad aki tambe pa bay core stage,” el a expresa.

Pa loke ta e diferencianan mas grandi entre Aruba y Belgica, el splica cu na Belgica nan tabata papia Hulandes so, e cambio di orario, di transport, di clima, ta algun di e factornan cu tabatin mas influencia. “Pero e tabata bon,” Acosta a expresa.

Warren Maduro, studiante di e unidad hospitalidad y turismo a conta cu el a core su stage na un hotel na Irlanda pa un periodo di cuater luna. El a remarca cu e tabata un tremendo experiencia pe. algo inolvidabel di cual el a siña hopi. “Claro na cuminsamento bo mester custuma cu algun cambio. Bo ta bay bo so, e clima ta full diferente, orario tambe. Pero e experiencia si nunca mi lo lubida.”

El a agrega cu e ta hopi contento cu tabatin e honor di ta un di e prome studiante cu por a haci realisa e biaha aki y habri porta pa otro studiantenan cu tambe lo kier haci algo asina. Di su banda e ta recomenda na tur studiante cu tin e oportunidad pa realisa un biahe asina, pa no perde e oportunidad.

“Si bo haya e oportunidad please haci’e. Bo ta crece hopi lihe, bo ta siña ta independiente mas lihe y bo ta siña conoce bo mes un tiki,” Maduro a subraya.

Pa loke ta e diferencianan entre stage na Aruba y Irlanda, Maduro a bisa cu e hendenan di aya ta un tiki diferente, nan manera di traha, nan manera di atende cu cosnan, nan cushina y full nan structura ta diferente. Algo, el a enfatisa, cu e mester a custuma cune, pero algo cu el a siña super hopi di dje.

Justin Lopez, otro studiante cu a core su stage na Belgica, a expresa cu e ta hopi contento cu e por a haya e experiencia aki, danki na Erasmus+. “E experiencia ta increibel. Nos a topa hopi reto cu mi no a expect pa topa na e trabao mes. E sistema cu nan ta usa, e personanan cu mi a topa na caminda, mi ta super contento cu mi a haya oportunidad aki,” el a resalta.

Pa loke ta e retonan cu el a pasa den dje, el a señala cu ta retonan normal, manera entre otro transport, orario, atmosfera.

Lopez a splica cu hopi di e cosnan na Belgica ta cu un standard, pero su manera di traha ta mas flexibel. El a sigui splica cu el a siña e Belganan con pa duna hende mas personalidad cu nan trahado. “Esey ami ta sinti cu mi a duna nan. Mi a siña nan pa traha cu diferente tipo di persona pasobra no tur hende ta bin mes stabiel, bo mester siña adapta y eynan mi a bin cu mi personalidad den e reto na Belgica,” el a remarca.

Richenne Croes, docente den e unidad di salubridad y servicio, ta un di e docentenan cu a participa den e grupo di docente cu a biaha cu e studiantenan.

El a splica cu e meta di e bishita tabata pa wak e luganan di stage. Nan a bishita e studiantenan cu a bay Belgica y tambe Irlanda. El a enfatisa cu nan a haci hopi conexion cu luganan di stage nobo, scol y companianan cu ta hopi interesa den e studiantenan di Aruba.

“E bunita di nos studiantenan ta cu nan ta multilingual, nan por desaroya y traha tur caminda,” el destaca.

Croes a conta cu como docente personalmente el a haya e biahe aki algo hopi bunita, un bunita oportunidad y ta su deseo pa esaki sigui y mas docente colega haya e oportunidad pa bay afo pa wak con otro scolnan ta funciona, con nan ta traha cu e studiantenan.

Un di e aspectonan cu Croes a aprecia di a wak den funcion ta e 21^st Century Skill (habilidadnan di Siglo 21) cu ta wordo implementa den e scolnan y den e diferente nivel.

“Bo ta wak den e klasnan, e lesnan ta wordo duna di un manera hopi dinamico, nan ta siña studiantenan di hopi jong caba pa ta responsabel pa bo estudio y bo educacion, pensa critico, pero tambe creativo y cu creativo mi kiermen haci uso no solamente den klasnan cu e material cu nan tin of no tin, pero pensa kico bo por haci cu e tiki cu bo tin y esey mi ta kere ami personalmente ta aprecia hopi pasobra hopi biaha nos no tin e medionan pa haci cosnan y nos ta pensa cu e ta algo imposibel. Pero eynan bo ta wak cu toch e ta funciona,” Croes a indica.

Comunicacion ta otro aspecto cu el a señala ta hopi importante den tur e etapanan, como studiante y docente cu ta traha y colabora cu otro. Tambe scolnan mes cu ta traha hunto, e mesun tipo di scolnan cu ta interactua cu otro y ta habri den nan comunicacion. Tambe e scolnan cu veld di trabao na unda e veld di trabao a bin na scol y nan ta yuda forma e studiante pa nan ta cla ora cu na bira profesional.

Croes a menciona cu nan a papia cu diferente scol y compania. Y como docente e ta hopi orguyoso cu e studiantenan di Aruba a haci hopi bon trabao tanto na Belgica como Irlanda. “Nan tabata super contento y entusiasma y nan kier mas studiante, algo hopi bunita,” el a resalta.

El a agrega cu nan a haci palabracionnan, tin interes y nan a trece cas algun luga di stage nobo pa e studiantenan.