Studiantenan a yega bon Hulanda

Cu tres vuelo di KLM a yega awe 31 di juli un cantidad di 210 studiante Arubano pa sigi un estudio avansa na nivel HBO of Universidad na Hulanda. Na Schiphol un delegacion consistiendo di Minister Plenipotenciario di Aruba Alfonso Boekhoudt, directora di Gabinete di Aruba Shandra John, functionarionan di Departamento di Enseñansa di Gabinete di Aruba, studiementor y miembronan di e POC (Plaatselijke Opvang-commissie) a ricibi e studiantenan. Sr. Boekhoudt tabata na e gate pa saluda e studiantenan na momento cu nan a sali for di e avion. Pafor den e sala di yegada e studiantenan a keda ricibi na un forma bon organisa y a haya instruccion di personal di Cas di Aruba y miembronan di e POC unda nan mester para den grupo pa warda nan turno pa bai na e bus cu lo hiba nan na nan cuidad di estudio.

Contrario na e preocupacionan cu tabata tin relaciona cu e 3 extra estadia na hotel na Groningen y Leeuwarden, esaki a ser paga door di Gabinete di Aruba, cargando esaki parcialmente riba e lening di e studiantenan. Dialuna 1 di augustus e studiantenan lo cuminsa cu e programa di “opvang” obligatorio, cual lo dura tres dia. Na comienso di e programa aki lo pasa un video den cual Minister Plenipotenciario Alfonso Boekhoudt no unicamente ta yama e studianntenan bon bini, pero tambe ta bisa cu nan a bin studia na un pais cu otro custumber y idioma. Cu e studiante lo enfrenta retonan, sigur den e prome aña. ‘Bo mester saca afor si e estudio cu bo a scohe ta esun bon pabo. Hopi preguntanan cu bo por tin den bo cabes. No cana rond cu nan, pero acerca bo mentor. Haci amistad cu Hulandesnan, pa asina siña mas y alabes esaki por yudabo domina e idioma Hulandes hopi mas mihor,’ asina Alfonso Boekhoudt a bisa den su mensahe den e video. Tambe e video ta contene un parti na unda directora di Gabinete di Aruba Shandra John ta duna e studiantenan algun tips, manera pa nan corda na lesa nan correspondencia di Gabinete di Aruba. Tambe pa nan ta cuateloso pa firma contractnan di companianan cu ta acerca nan ariba caya of via email. Sra. John a bisa den su mensahe cu e studiantenan e aña aki a ricibi un suma grandi for di Aruba pa cubri nan gastonan pa un periodo largo. ‘Corda bai bon cu boso budget y no use den un solo biaha, pa asina bo no hayabo cu problema financiero. Tambe nos ta conseha pa cana tur momento cu e carnet di aseguro. Pa asina si algo pasa, nan por mira cu boso ta segura,’ segun E prome aña e studiante ta ricibi guia di e studiementor, pero pa e resto di su estudio e ta cai bou di Gabinete di Aruba. Functionario di departamento di Enseñansa di Gabinete di Aruba Ivonne Navas den e video ta mustra e studiante ariba e Facebook di Onderwijszaken unda nan por keda na altura di loke ta pasando.

Tambe via di Facebook nan por haci un pregunta of duna nan comentarionan. ‘Tambe un peticion na nos studiantenan pa bishita e website arubastudent.com pa informacion relevante tocante di nan aseguro. Boso a firma un contract pa un prestamo di estudio (Arubalening) cu ta otro cu e studiantenan di aña pasa. Lesa boso contract bon pa asina boso ta na haltura di kico ta para den dje,’ segun conseho di Ivonne Navas na e studiantenan. Na final di e video Minister Plenipotenciario Alfonso Boekhoudt ta bisa cu e ta spera cu e infor- macion brinda lo contribui na exito di e estudio y cu e diploma na final ta un sentido di orguyo pa nan mes, nan famia, pero tambe pa Aruba. Ariba e website di Cas di Aruba www.arubahuis.nl tin un reportahe fotografico extenso di e yegada di e studiantenan.