Un studiante a tira dos compañero di klas mata, y a herida otro cuatro studiante na Goiania, capital di estado Goiás, Brasil. E crimen a tuma luga diabierna mainta, den un klas di e Colegio Goyases. Banda di e dos victimanan mortal, João Vitor Gomes y João Pedro Calembo, ambos di 13 aña, otro cuatro alumno, di mesun klas, a keda herida. Un di nan por a bay cas diadomingo despues di tratamento na un hospital local. E otro tresnan ainda ta interna.
Bullying
Coronel di Polis Militar Anésio Barbosa da Cruz a informa cu e autor di e crimen tabata victima di bullying di coleganan di klas. El a rebeldia contra esaki, a haya e arma na cas, di su mama cu ta polis, y a uza esaki pa efectua e tiroteo,” el a declara. Un alumno di 15 aña cu tabata den e klas na momento di e tiroteo, tambe a conta cu e studiante tabata victima di mal chansa di su coleganan.
Yiu di dos polis militar, e adolescente ta cera den un cel separa di un destacamento policial na Goiania, pero mester hib’e un centro di internacion provisorio di e estado. Riba peticion di Ministerio Publico, diasabra hues Monica Cezar Moreno a dicidi cu e hoben mester ser encarcela pa 45 dia di prizon preventivo, na e Centro di Internacion Preventivo pa adolescente na Goiania. Segun e abogado di e famia di e hoben, Rosângela Magalhães, e mayornan ta teme pa su bida den e centro aki, y ta prefera pa e keda na e delegacia unda a hib’e prome.
“E centro di interaccion di aki no ta sigur, pa motibo di e caso mes, y tambe cu e mayornan ta polis militar, y e tata tabata envolvi cu e siguridad di e batayon di e sistema penitenciario, loke ta trece peligro pa e bida di e hoben.
E dos hobennan cu a perde nan bida den e crimen a haya entiero e dia siguiente mes, diasabra ultimo.
