Actualmente studiando verpleegkunde na Almere, Ryanne Bowers ta un hoben Arubiano di 23 aña cu a bin Hulanda riba su mes. El a pasa un prome aña dificil cu basta desafionan na scol. Den e entrevista aki Bowers ta conta Bon Dia Aruba kico a hiba e na e decision aki y e ta duna conseho na hobennan cu ta planeando pa bin.
Bowers ta studiando pa bira un pedagogische hulpverlener.
“Bin Hulanda ta algo cu mi a dicidi na ultimo momento ora cu mi a caba EPI, pues mi no a haya sosten financiero di Aruba, ta mi famia y mi pareha a yuda mi. E prome aña tabata hopi duro, mi no tabata sinti mi bon bini entre mi compañeronan di klas. Mi tabata purba hopi pa mescla cu nan, nan djis no tabata worry cu mi. Danki na mi maestronan cu tabata apoya mi, mi a logra di keda motiva y pusha bay dilanti. Awo cos ta miho, pero mi a struggle hopi.”
“Na Aruba nos ta hende asina social y habri y akinan tur hende ta asina cera. Akinan niun hende ta acerca bo pa haci algo. Esey tabata traha hopi riba mi.”
Traha duro
Bowers ta subraya cu e ta haya falta di bida na Aruba mas sinembargo e ta gusta e mentalidad di hende na Hulanda. Ora el a caba EPI, e tabata sinti cu e no tabata tin mucho opcion mas na Aruba. “Akinan na Hulanda, mi a ripara cu keda keto no ta yuda cu nada. Bo mester para pa bo mes, purba di puntra y traha duro. Hulandesnan ta hende cera pero nan ta gusta hende cu ta traha duro. Si bo para pa kico bo ta kere aden, hende lo respeta bo mas. Bo mester bringa pa bo wordo scucha.”
Practica Hulandes
Pa un solo vak, cual tabata un examen cu tabata consisti di un entrevista Bowers no a logra di haya su propedeuse den e prome aña, algo cu a desapunta su persona hopi. “Solamente pasobra mi Hulandes no tabata mucho bon, mi a keda sin pasa e vak. E tabata consumi mi cu mi no por expresa mi mes decentemente na Hulandes, pa e motibo ey mi ta avisa tur hoben cu kier bin Hulanda, pa realmente cuminsa practica nan Hulandes pasobra e ta yuda bo asina hopi”
