Riba diabierna ultimo durante conferencia di innovacion Atech Bon Dia a acerca un compania enfocando pa duna servicio na artistanan independiente y Caribense. Alabes algun hoben studiante di International School of Aruba a expresa cu entre otro despues di bishita e conferencia nan lo kier sigui un carera den ingenieria den futuro.

Durante conferencia di tecnologia y innovacion Atech den fin di siman ultimo publico presente por a mira diferente presentacionnan duna pa oradonan local y internacional riba diferente aspectonan tratando cu innovacion den espacio di tecnologia.

Aunke hopi di e proyectonan y companianan cu a wordo presenta durante e evento tabata relaciona cu tecnologia of financia, e biaha aki e evento tambe a sa di atrae companianan y innovadonan cu kier trece cambio den espacionan relaciona cu arte, reciclahe y te hasta aspectonan social.

Skempi

E evento tabata encera un competencia di pitches unda diferente companianan tabata purba convence un hurado di expertonan dicon nan proyecto y compania ta importante pa futuro. Un di e companianan aki yama Skempi, cual ta un servicio online pa stream muziek di artistanan independiente.

Skempi a cuminsa como un servicio exclusivamente duna pa artistanan Caribense, pero actualmente nan ta purbando expande pa mercado internacional. E compania su base ta na Hulanda y Inglatera pero su fundadonan ta originalmente di Corsou, unda tambe tin un base di operacion.

E servicio cu Skempi ta ofrece ta similar na servicionan ofreci pa companianan grandi manera Spotify y Apple Music. Loke ta resalta di Skempi su enfoke ta cu e compania ta ofrece nan servicio na artistanan independiente y ta purba di diferente manera pa aporta na e grupo aki.

Placa ta determina cua muziek ta bira popular

Co- fundado di Skempi Boudino de Jong a conta Bon Dia durante e evento cu e compania ta paga e artista 90% di e ganashi cu ta wordo genera for di benta. “Esencialmente nos ta removing the middle man. Nos ta kitando e stapnan adicional manera record labels y publishers cu ta sinta entre e artista y nan plataforma”. Segun sr. de Jong, esaki ta esencial pa artistanan independiente por tin acceso na dje, mirando cu e music publishers y record labels ta dicta kico lo bira popular den e industria di muziek.

“Un grupo chikito so ta haya e privilegio pa cera contracto cu record labels y publishers. E ta rekeri cu e artista ta profila nan mes y tambe tin algun suerte envolvi. Nos ta spera cu Skempi lo podera artistanan independiente”.

E dos efectonan cu sr. Boudino y su compania lo kier crea ta pa artistanan independiente haya mas atencion, pero tambe pa e poder di record labels wordo nivela. “Manera e ta awo un grupo chikito di artista so ta haya e placa pa nan por eherce nan carera, pero tambe muziek ta bira menos monotono, mirando cu placa ta dictando kico mundo ta scucha”.

Siguientemente sr. Boudino ta conta nos cu nan decision pa move nan enfoke di artistanan Caribense y independiente pa artistanan independiente rond mundo tabata motiva pa e realisacion cu e problema cu artistanan ta enfrenta pa pusha nan muziek den e industria y tambe e pago di artista ta algo cu ta afecta artistanan rond henter mundo.

Skempi ta ofrece artistanan un plataforma unda nan por keda doño di nan propiedad intelectual y por haya un plataforma cu lo boga pa nan inclusion como artista independiente.

‘Atech ta prueba cu islanan chikito ta profesional’

Pa loke ta trata e contenido di e discursonan hiba dilanti, pa sr. Boudino 2 a resalta: un app cu pa medio di artificial intelligence por reconoce productonan den potret riba social media y un app cu ta incentiva consumidonan pa cumpra productonan den supermercado cu lo vence den poco tempo. ‘E charlanan tabata hopi varia’, sr. Boudino a expresa.

Sr. Boudino a clausura pa medio di expresa su experiencia cu Atech Conference 2017, cual el a haya hopi bon ehecuta. “Mi a keda impresiona cu e conferencia pasobra nos sa mira e tipo di conferencianan aki na Hulanda y Merca pero e atencion pa detaye akinan tabata excelente. Aunke hopi biaha tin un pensamento cu nos na e islanan ta mas chikito, esaki sigur ta prueba cu nos por mesun bon y te hasta miho cu otro den paisnan mas grandi”.

Studiante di ISA

Durante e evento por a mira studiantenan di entre otro International School of Aruba (ISA) cu a wordo invita pa presencia e evento. Nos a acerca un grupo di studiante di ISA pa puntra kico nan a haya interesante y nan motivacion pa atende e conferencia di tecnologia. Jesseline Diaz a conta Bon Dia cu el a haya interes pa atende pa mira algo diferente. Esaki segun sra. Diaz ta debido na e manera con e proyecto ta wordo presenta.

“Nunca mi a pensa cu tecnologia lo ta asina grandi riba un pais asina chikito. Mi tabata curioso pa amplia mi conocemento di loke ta pasando rond mundo.”

Loke a resalta segun sra. Diaz tabata cu un presentacion a wordo duna unda tabata enfoca pa podera hende muhe pa tambe drenta mercado laboral den area di ingenieria, cual hopi biaha ta dificil pa nan mirando e stigma cu tin rond di hende muhe pa eherce cierto trabounan. E presentacion a wordo duna pa Nicole Kelner, fundado di GirlCode.

“El a corda mi hopi riba un tayer cu a wordo organisa pa nos scol riba Women’s Engineering, unda nan a siña nos cu hende muhe tambe por ta lidernan y eherce trabounan cu tradicionalmente ta wordo considera manera masculino”.

E tayer aki y Atech a yuda sra. Diaz pa haya un perspectiva mas amplio riba posibilidadnan cu e lo por tin den futuro, segun e.

Stefania Ciccarelli, kende tambe ta studia na ISA a conta nos cu el a haya interes pa bay atende na Atech pasobra ‘mi tin hopi interes den tecnologia y lo mi kier studia Systems Engineering’. Fuera di esaki sra. Ciccarelli a expresa cu e di tur e temanan cu a wordo toca, algo cu lo keda cu ne ta cu tecnologia por mehora bida diario di ser humano.

“E ta inspira mi pa haci cosnan cu mi nunca a kere cu lo mi tin e capacidad pa realisa”.

Ambos studiante di ISA a expresa di kier sigui un carera den ingenieria, pues nan tabata contento di a bishita e conferencia pa amplia nan perspectiva riba e tema aki.