Recientemente por a tuma nota di e dilema entre studiantenan recien yega na Hulanda y Arubahuis. Despues di a scucha tur dos banda di medaya, un otro studiante a yega na Bon Dia Aruba pa conta su storia di kico ta pasando.

E hoben ta conta na Bon Dia Aruba kico a pasa cu POC, cu ta e comision cu ta atende cu studiantenan ora nan yega. “Un dia prome cu mi ta bay subi avion pa cuminsa cu un etapa nobo un mensahe ta drenta di POC. Mi ta habri esaki lesa, tabata trata aki di mi schedule di mi siman cu POC. Riba e prome dia cu nos ta yega ta para ‘koffers kunnen worden opgehaald’. Mi a spanta como mi ta bay studia na Den Haag y no tin famia cerca. Mi a hayami den un momento di panico y no tawata sa ki pa haci. Mi a puntra si por a keda na hotel pero a bisa cu no ta recomenda esaki paso e hotel ta caro. Cual mi no ta compronde dicon a busca un hotel caro si nan sa cu e posibilidad cu mucha nan lo bay tin cu paga pa keda mas anochi ta hopi grandi. Pa suerte mi a haya un amiga cu a ofrecemi keda 1 siman cerca dje na Den Haag, sino lo mi no sa con pa haci paso mi tin famia te Arnhem.”

Schedule bruha
Manera e otro studiante a comenta na Bon Dia, den edicion anterior tocante e bruhamento di schedule, e studiante aki a remarca mesun cos. Nan a saca nan di hotel pa bay haci actividadnan mientras cu nan tabata cansa di un vuelo largo. “Nos a yega Hulanda rond di 11or, a yega hotel y a haya un rato pa rust cual no tawata masha. E momento ey e ora a bula super lihe,  mi no a haya chens mes pa pone mi cabes riba e cusinchi. Ora pa sigui cu e schedule a yega. E dia aki no a regel nada di camber/cas, pues si bo mester a regel bo camber pa bo bay siguiente dia mi no sa con esey lo a bay como nan no ta lagabo haci otro cos cu no ta para den e schedule”, e studiante ta sigui conta.

Segun e studiante, 6 augustus ta dia cu nan lo a pasa diferente makelaar pa asina yuda esnan cu no a haya camber/cas ainda wak si nan ta haya algo. “Asina tawata para den e schedule ma esaki no tawata e caso. Nos a pasa Vesting Vastgoed y a pasa full e dia aki. Ami ta un di e cuatro muchanan cu mester a firma contract, pa un luga cu mi a haya danki Dios net prome cu mi a yega.”

Buscamento di camber laat
E studiante ta comenta, cu claro cu buscamento di camber ta keda e cada ken nan responsabilidad, pero no por acusa di cuminsa busca camber laat siendo cu tur studiante ta cuminsa busca trempan y hopi no por haya algo.

Studiante: “No mi no a cuminsa busca laat, for di januari caba mi ta riba buskeda. Nos a yega banda di 1or na e makelaar y mi a logra keda cla te band’i 6or. Mi a keda eynan sin come. Ta riba caminda pa coy tram mi a cumpra algo pa mi cone como nos mester a bay banco 7or. Berdad a duna informacion cu ta hopi importante pa busca cas ma esaki a wordo haci 23 juni, cual ami personalmente ta haya ta laat, pero ja kico ami sa?”

E studiante a sigui cuminda cu: “Mi a lesa un articulo riba noticia caminda ta poni cu nos por a busca bais, cual mi a haya hopi brutal como nan su cu Hulanda ta un pais nobo pa hopi di nos studiantenan y mi no ta kere ami riba un bais na un pais grandi cu mi no conoce ta un bon idea. Mi no a comenta riba e articulo aki pa ofende pero pa informa y pa por haci algo tocante esaki pa e beursalennan di 2019.”

Nota: Potretnan di e articulo aki ta di yegada di e studiantenan. E potretnan aki ta solamente pa ilustracion y no necesariamente un di e studiantenan aki a tuma contacto cu Bon Dia Aruba. Potretnan a wordo tuma di e pagina publico di POC Delft Den Haag Leiden – Aruba.