Diamars ultimo e curso preparatorio di aña 2017-2018 na Academy of Fine Arts & Design a cuminsa. Bon Dia a acerca pa comentario e docente y artista contemporaneo Glenda Heyliger kende ta cuminsa cu e grupo di mas o menos 20 studiante di arte y diseño.

E curso, cual ta wordo duna anualmente na e academia ta uno cu tin como meta pa laga personanan interesa den e ramo di arte y diseño experimenta cu diferente disciplina artistico. Entre otro, studiantenan ta haya les pa pinta, diseño 3D digital, dibuha, moda, pone imagen den movecion, video art y instalacion artistico. Cada curso ta dura mas o menos un luna y pa cada disciplina profesionalnan di Aruba of di afo ta guia e studiantenan.

Concepto tras di e lesnan

Pa e prome les, sra. Heyliger y Kevin Schuit ta introduci e concepto y filosofia di e les na e studiantenan. E concepto ta uno unda e studiantenan ta wordo encurasha pa analisa criticamente e relacion entre e individual y sociedad colectivo. E docentenan ta uza e metafoor di e curpa y con diferente organonan ta traha hunto pa asina tin un bon funcionamento di e totalidad.

Pa explora esaki e docentenan ta conduci varios experimento pa laga e studiantenan familiarisa nan mes cu dibuho, pintura. Nan ta haci esaki mientras cu un persona ta haci movecion, para of sinta den diferente posicion. Tambe nan lo experimenta cu zonido y e papel cu esaki ta hunga den arte.

Sra. Heyliger ya tin 4 aña dunando su les pa e studiantenan, kende cada aña ta cambia. Pa esaki nos a puntra sra. Heyliger kico ta e manera con e ta conduci e lesnan y su motivacion pa duna e les di e manera cu e ta dun’e.

“Mi ta nota cu mas avansa tecnologia bira, mas atras nos como ser humano ta bay. Esaki ta manifesta den diferente manera, pero pa mi e manera mas simpel y personal pa ilustra esaki ta ora bo weita un camber yen di hende. Tur hende ta wak abou na nan pantaya di telefon, enbes di wak dilanti y wak otro”.

Segun sra. Heyliger, e modo di interaccion aki ta hopi superficial y ta casi un caricatura di bida, ‘manera si ta bida morto’. Sra. Heyliger ta expresa cu e no ta kere cu nos tin libertad berdadero, aunke nos kier kere esaki.

“Loke mi ta purba haci ta conscientisa e studiantenan pa pensa criticamente tocante tur e cosnan cu ta wordo ofreci na nan di manera gratis riba nan smartphone. Facebook, WhatsApp, Twitter. Nan por ta gratis pero semper tin un prijs cu bo ta paga sin cu bo sa. Tur e informacion cu tin deber cu bo ta wordo colecta. P’esey mi ta kere ta importante pa nos puntra nos mes dicon esaki ta asina y si tin algun motivacion tras di e cosnan aki.”

Studiante mester pensa criticamente

Sra. Heyliger ta splica cu si lo tin un tema den su lesnan, ta cu e ta purba enfatisa cu e no tin tur e contestanan. “Ami semper ta bisa cu ami no ta e docente y e studiante no ta menos cu mi persona. Si no cu ami ta e studiante y ami ta purbando siña di otro hende”, el a splica.

“Mi kier pa e studiante bay mas leu di loke ta posibel of di loke ta spera di dje. Mi kier pa e studiante ta e filosofo, e cientifico, e profesor. Cu esaki mi kiermen cu mester amplia e mente y cuminsa mira cosnan di manera mas critico. Simplemente memorisa un buki y despues lubida di dje no ta suficiente. No ta importa kico bo ta studia, bo mester pensa kico ta bin bo dilanti aki 5 aña.”

Pa sra. Heyliger, e studiante mester ta na alerta di loke ta pasando rond mundo. E studiante mester bay mas leu cu ta posibel, pa cuestiona loke ta pasa rond di nos y kico e orden estableci y e sistema a determina pa nos. “Mi tabata un squatter y mi ta kere firmemente cu mester bin mas oposicion contra inhusticia y inhumanidadnan pasando rond mundo, pero cu un mente intelectual”, segun sra. Heyliger.

E concepto cu sra. Heyliger y sr. Schuit ta trahando riba dje conhuntamente cu e studiantenan, ta refleha e filosofia aki. E obra lo ta uno interdisciplinario y lo wordo exponi durante e Aruba Art Fair na San Nicolas.

Carera

Aunke sra. Heyliger tin 30 aña den mundo di arte, originalmente el a opta pa un carera den medicina como microbiologo na Hulanda. Despues di studia el a dicidi di bin bek Aruba, pero no tabatin trabou pe den e area cu el a studia. E ta conta cu despues di a conoce Elvis Lopez di Ateliers ‘89, el a wordo inspira pa studia moda. “Elvis semper ta purba yuda bo yega na bo maximo potencial.”

Sra. Heyliger a splica tocante e trabou cu e ta haci como artista contemporaneo. “Mi ta enfoca pa un par di aña primordialmente riba trabounan cu ta wordo haci hunto cu e comunidad”, el a bisa.

Specificamente sra. Heyliger ta referi na community art, cual ta un tipo di arte cu ta enfoca mas riba e proceso di traha e arte y e personanan envolvi cu e trabou.

“No ta importa na unda riba mundo mi a bay como artista internacional, pa mi e aspecto mas importante di mi trabou y di arte en general ta pa crea lasonan entre personanan y comunidadnan. Mi ta kere cu enbes di ta isola manera artistanan local nos mester bay afo y traha hunto. Pa mi e arte mes no ta di mucho importancia, ta e proceso y e intercambio di informacion ta loke ta conta.”