Studiante di medicina cu intencion pa drenta gemeenteraad na Hulanda hunto cu CDA; Mandy Villasmil kier ta e stem di e Hulandes di Caribe na Den Haag

Tin un lista diverso di candidatonan cu ta refleha e comunidad di Den Haag, bao direccion di e lider di partido y consehal Hilbert Bredemeijer, pa pa e eleccionnan municipal. Asina e partido a anuncia su candidatonan y number 8 riba e lista ta un hoben di Aruba, Mandy Villasmil, un posicion cu ta ilustra e speranza cu e partido tin cu e candidato Arubiano.

Mandy Villasmil ta un studiante di medicina na Hulanda. Pero ta un hoben kende a lanta den bista publico. No pa motibo di politica, sino pa motibo di su talento musical. Di mucha e tabata participa na conciertonan, riba piano mas tanto. Pero su talento cu violin a haci posibel pa e por a pasa cas pa cas pa toca dande. Pero su ambicion profesional tabata medicina y asina el a bay Hulanda.

E tabata un movecion cu Mandy no a pensa riba dje inicialmente. Tabata Juan David Irausquin kende ta biba na Hulanda kende a acerk’e cu e idea pa uni na CDA. E partido tabata buscando un candidato cu por representa e comunidad di Caribe na Hulanda y Irausquin a pensa riba dje. “Mi a keda sorprendi pasobra mi no tabata pensa riba politica na Hulanda mes.” Pero, despues di a tuma un tempo, Mandy a puntra su mes “di con no? Mi por yuda hopi hende aki, y e por ta un bon experiencia pa mi.” Asina el a acudi na CDA y e por a conta cu sosten y apoyo di su mayornan pa e decision aki. “Nan a duna hopi sosten for di principio y nan tabata contento, pero tambe nan a urgi pa mi a pensa bon prome cu tuma e paso.”

Partido centrista

Pero dicidi pa uni y bira parti di un partido politico na Hulanda no ta bay asina facil. Villasmil mester a drenta un proceso di solicitud. El a bay den un serie di entrevista cu representantenan di CDA, cu despues no solamente a inform’e cu el a keda acepta pa ta riba lista, pero cu hasta el a haya e posicion number 8 pa e lista di 40 candidato cu ta bay pa e eleccionnan municipal na Den Haag. “Mi tabata mik pa haya un posicion halto, pasobra mi kier representa e interes amplio di e Hulandes di Caribe na Den Haag. E retonan ta hopi.” Villasmil a bisa cu CDA a pon’e sinti na cas den e partido, y ta brind’e tur ayudo den su carera nobo. “Nan ta un partido cu tin conexion cu e islanan, y nan sa caba cierto aspecto di nos. E ta un partido cu ta centrista y ta acepta opinionnan diferente.”

Sinti na cas

E enfoke di Villasmil ta pa crea e condicionnan pa personanan Hulandes di Caribe sinti nan mes na cas na Den Haag. E ta inclui crea e facilidad pa cana e caminda burocratico pa por integra den e comunidad, pero tambe pa integra den e sociedad mes. “Esey ta e obhetivo mas grandi, esta pa nos hendenan sinti realmente cu nan ta na nan di dos cas aki (na Hulanda),” Mandy Villasmil a bisa. “ArubaHuis ta haci locual e por y loke e tin. Mi no sa bon kico tur ta pasa den Arubahuis, pero mi ta sinti si cu e instancia lo por yuda nos studiantenan miho. For di experiencia di mi ruman mas chikito, compara cu mi mesun experiencia, e conclusion ta cu e ‘opvang’ a bay un poco diferente. E aña cu mi a bin, studiantenan por a haya un BSN temporario cu a permiti nan habri un cuenta di banco di forma mas facil. El a bay mas soepel. P’esey tabata conta cu ArubaHuis cu tabata yuda den e proceso. Pero, esey no tabata e experiencia di mi ruman muhe y tur esnan cu a yega Hulanda cune.”

Na e momentonan aki, Gobierno Hulandes a compromete pa traha riba e tema aki riba su mes, esta pa percura cu studiantenan di Reino Hulandes for di Caribe lo por haya nan BSN nummer prome cu bay Hulanda mes. “Pero e ta dificil pa bisa si na nivel nacional, esaki lo ta cla pa ora e siguiente grupo di studiante yega Hulanda. Ami lo kier pa e sucede di awe pa mañan, pero mi no tin hopi tempo ni experiencia pa bisa na nivel nacional Hulandes, kico tur mester haci pa tur studiante cu yega di islanan tin nan BSN. Mi ta kere cu e ta un caminda cu mester cana y no ta sucede un dos tres.”

Grupo homogenico?

Villasmil ta profilando su mes como un posibel representante di personanan di Reino Hulandes cu ta procedente di Caribe. Aunke cu e culturanan di e islanan por ta diferente, na Hulanda e retonan ta similar. “Ultimo mi a bay un reunion cu e Secretario di Estado pa Relacionnan di Reino, Alexandra van Huffelen a organisa y eynan toch bo ta sinti bo na cas cu tur hende, maske cu nan por ta di Saba, St. Eustatius of Corsou. Pasobra hende di isla tin casi mesun experiencia cu otro. Tin casi mesun cultura y tin hopi en comun, cu ta inclui e idioma cu ta un mescla di Ingles, Hulandes y Papiamento y ningun hende ta lanta cabez. Bo ta sinti bo mesora na cas cu otro y ta asina nos kier pa sinti na Hulanda, sigur ora cu nan bin Hulanda.”

Di otro banda, aunke Villasmil a menciona e tema di BSN y studiantenan, su enfoke ta mas amplio cu djis e bienestar di studiantenan cu ta bay Hulanda. Su enfoke ta e comunidad en general y kico un conseho di municipio, esta e gemeenteraad por haci pa yuda nan integra. Pero no tin duda cu e aspecto di studiantenan ta keda esencial. E ta den preparacion caba, pero locual nos kier percura pa sucede ta pa organisa un evento di bonbini na e gemeentehuis di Den Haag pa yama por ehempel studiantenan, pa mustra cu nos t’ey pa nan. “Mi ta kere cu e sentimento ey caba, ta bay yuda esnan cu ta yega nobo pa sinti nan mes mas na cas.” Y ta for di e municipio por yuda compatriotanan for di Caribe pa yega na nan cas, pasobra sin un cas dificilmente por integra.

“Ami kier ta e voz di e persona di Caribe den gemeenteraad. Na Den Haag tin como 15 mil hende for di e islanan di Reino Hulandes ta biba y mi kier ta nan representante. Nos interes no ta tur ora e mesun cos cu di e Hulandes Europeo. Un ehempel ta cultura y aceptacion. Un studiante di Hulanda lo no tin problema pa bay biba cu 10 otro hende. Nos hendenan ta prefera un studio. Pues, ora mester bin e discusion riba construccion di mas cas pa studiante, lo por tene cuenta awor cu e necesidad di e grupo di Caribe. Ta puntonan cu mi ta scucha di e grupo di nos islanan na Den Haag.”

Campaña na Hulanda

Eleccionnan pa gemeenteraad lo ta 16 di Maart, aunke cu ya por cuminza vota trempan, esta dia 14 y 15 di Maart. Si Mandy Villasmil logra drenta gemeenteraad, e lo ta pa un periodo di cuater aña. “Pues mi lo ta na Hulanda por lo menos cuater, of hasta seis aña mas. Pero despues, mi lo no sa cuanto mas. Mi kier bolbe Aruba, pero mi no por bisa ki tempo esey lo ta.”

Un cos si cu Villasmil a ripara cu campaña politico na nivel di municipio en todo caso ta diferente cu campaña na Aruba . “Pa cuminza, e ta menos personal. E ta debatenan ta riba tema. Mi a participa na debatenan y contrario na Aruba, unda ta ataca otro personalmente, aki e tabata hopi bon. Hasta personanan di otro partidonan tabata sostene pensamentonan. E atmosfera tabata agradabel, amigable y profesional y esey tabata bunita pa experiencia.”

Pa loke ta musica? “Tin cantica cu no ta sali di mi dedenan mas,” pero pa awor musica ta na un otro luga den e bida di e politico Hulandes, Mandy Villasmil di Aruba.