SAN FRANCISCO (AP) — Un studiante universitario di prome aña di Northern California ta enfrentando cargo pa delitonan grave, pa supuestamente a crea un app pa iPhone cu el a yama Banana Plug, pa bende droga ilicito.
Collin Howard diamars a declara su mes inocente di cargonan federal di droga na San Hose, despues cu un hurado a acus’e dia 14 di februari ultimo. Howard, di 18 aña di edad, a declara su mes no culpabel di acusacionnan similar na Santa Cruz County, unda el a wordo aresta den su dorm na e Universidad di California dia 28 di november.
E investigacion a cuminsa na november, ora un polis di campus a nota un di e varios poster colga rond campus anunciando un app yama Banana Plug, segun fiscal. E mascota di e scol ta e banana slug, y plug ta slang pa un bendedo di droga.
Banana Plug por a wordo download for di e App Store online, y a wordo anuncia como un wega gratis, cu e motto ‘Nos Tin Locual Bo Kier’, pero e usuarionan por a bestel droga mediante e app, segun investigadonan.
Polis di campus y agentenan di e departamento di Homeland Security a bisa cu nan a lansa un operacion clandestino cu a inclui cuater benta di droga uzando e app.
Vocero di e universidad, Scott Hernandez-Jason, a bisa cu Howard ‘no ta un studiante di UC Santa Cruz mas’. Citando leynan di privacidad studiantil, Hernandez-Jason a nenga di bisa si Howard a wordo expulsa of a retira boluntariamente.
Defensor publico federal di Howard, Rhona Taylor, no a duna comentario inmediat. Howard a wordo libera bou fiansa na corte estatal y federal.
Vocero di fiscal Mericano, Abraham Simmons, no a duna contesta inmediato tocante e motibo cu acusacion a wordo haci na nivel federal despues cu Howard a wordo acusa na corte estatal na Santa Cruz.
