WILLEMSTAD – Hogeschool Rotterdam ta nenga cu studiante Curasoleño y Arubiano no ta bonbini pa motibo di mal resultado di slaag pa examen. Al contrario, Hogeschool Rotterdam a obliga su mes di yuda baha e cantidad di studiante cu no ta caba nan estudio. Asina Irene Kastaneer ta bisa. E ta representante di Hogeschool Rotterdam na Corsou.

Kastaneer ta coordinado di e proyecto ‘Subi Jet pa bo Get’. Esaki ta un programa preparatorio na Corsou y Aruba pa studiante cu ta bay studia na Hogeschool Rotterdam. Ta trata topico manera idioma, diferencia cultural, traha budjet y habilidad di studia. Pero e programa mester ta miho. Esaki ta segun e fuente Retkaribense.

Miho conseho
E trainernan di e programa preparatorio cuminsamento di februari a bay Rotterdam pa finalisa e mehoracionnan pa e programa. Trainer Sennon Kastaneer a participa na e encuentronan aki na e scol. “No ta berdad cu e studiantenan no ta bonbini mas. Loke si ta importante ta cu e programa ta cuadra mas cu e necesidadnan di e studiantenan y cu nan ta haya un conseho mas cla despues di nan check di escudo di estudio. Ke men por sosode cu nos ta conseha studiante cu ta hoben of di cua e Hulandes ta suak, pa sigui un estudio na nan isla prome.”

E cantidad di studiante for di e parti Caribense di Reino cu no ta caba nan estudio ta masha halto. E Hogeschool aña pasa a laga sa cu nan no ke tuma studiante mas di Corsou y Aruba. E scol na juni a insisti cerca e minister Hulandes di enseñansa Ingrid van Engelshoven pa obliga studiante Caribense pa sigui un programa di entrada.

Universidad di Aruba algun aña caba tin un aña special cu ta prepara studiante pa studia na Hulanda of Merca. Por ehempel ta duna nan les extra di Hulandes of habilidad di studia.

Despues di e enkuentro di cuater pais tocante enseñansa na februari, Corsou, Aruba, Sint Maarten y Hulanda a forma un grupo di trabou pa investiga pakico hopi studiante Caribense no ta haya nan diploma.

E topico ta ripiti
Studiante cu no haya diploma mester paga nan fiansa di estudio y di gasto di OV bek y hopi biaha ta keda Hulanda pa traha. E miembro di Tweede Kamer pa D66 Jan Paternotte durante e Deliberacionnan Interparlamentario luna pasa na Sint Maarten a enfatisa cu e enseñansa avansa na Hulanda mester contribui na e desaroyo di Hulanda Caribense. Ke men cu studiante mester regresa cu un diploma den nan saco. “Esey ta un topico tambe cu keto bay ta bini bek den e comision di Tweede Kamer pa Relacionnan den Reino.