Kenisha York (3).jpg

Den un intento di conecta Aruba cu diferente otro isla Caribense, Bon Dia Aruba lo entrevista mas studiante di e region cu a opta pa bay Hulanda. Den e entrevista aki  Kenisha York cu ta un hoben di e isla Anguilla ta conta nos un tiki di su storia.

York ta studiando Media and Communications na Utrecht, “E berdadero motibo pakico mi a laga mi isla ta pasobra mi tabata trahando na un kleuter scol y nan a cera. Pues nan a kita nos tur for di trabou. Mi a cuminsa drenta den panico, pasobra claro cu na nos isla e opcionnan ta basta limita. E ora mi a yama mi tata y mi a conta e di e situacion. E ora el a sugeri pa mi bin Hulanda y studia, pues e tabata mustra manera un bon oportunidad. Pero si tabata pa mi, ainda mi lo tabata na mi isla”, e hoben ta conta.

 

Cultura Caribense

 

Algun luna pasa, Bon Dia Aruba a entrevista Robin de Vogel tocante Caribbean Linked y el a expresa cu e conexion cultural entre islanan den Caribe ta masha intenso, nan ta hopi intimo tambe. York, ta comparti e sentimento aki tambe. E ta bisa “Mi ta wak e similaridadnan cu ami y otro studiantenan Caribense ta comparti. Nos ta simplemente mas relaha, mas alegre”

 

Bon Dia Aruba a puntra York kico ta un di e cosnan cu mas a impacta su persona, ora el a bay di “island living pa big city life”.  E hoben ta comenta “Locual mas a impacta mi di Hulanda ta cu tin asina tanto regla pa tur cos y tanto consecuencia. Na Anguilla nos ta hisa benta y akinan tur cos ta un problema. Si bo a crusa caminda ora e luz tabata cora ta un problema, si bo a faya bo afspraak cu dokter bo ta haya boet. Tin tanto regla tur caminda y niun hende ta bisa bo nan ta existi”.

 

Individualismo

 

York ta conta cu como tur otro pais, su isla Anguilla tambe tin su defectonan.
Sinembargo e ta haya falta di su hendenan. E ta comenta “Na Anguila, si algo pasa bo riba caya ken cu ta, ta duna bo un man. Akinan na Hulanda hende ta hopi enfoca riba nan mes, nan ta hopi directo tambe cual ta pone bo pensa cu nan ta fresco. Pero ora bo comprende cultura Hulandes, bo ta comprende pakico nan ta asina. Mi ta haya hopi falta di mi amigonan y e felicidad di hendenan den Caribe. Pasobra na final di dia, e no ta unda bo, ta cu ken bo ta.”