E ta algo cu te ainda ta sosode masha poco: un Arubiano bib’a na Hulanda cu ta drenta politica na Hulanda. Esaki ta sosode menos ainda bou hobennan cu ta biba y studia na Hulanda. Mandy Villasmil a bira e excepcion! Mandy ta jiu di majornan Arubiano cu ta biba na Aruba. E ta un hoben inteligente, humilde den su comunicacion cu tur hende.
E tin un sentido di humor bunita. E ta scucha bon y papia cla. Tur esaki ta haci’e un persona facil pa aserca y pa comunica cun’e. Mandy a bay studia pa bira docter (medico) na Hulanda. Na maart e aña aki ta gradua. Politica no ta desconoci pe. Ela lanta den un famia cu pa hopi aña caba ta activo den politica na Aruba. E mes ta bisa cu un dia e a pensa di bira activo den politica, pero e no a spera cu esaki lo a sosode asina lihe. Den eleccion pa “gemeenteraad” na Hulanda mas laat e aña aki, Mandy Villasmil ta aparece como candidato number ocho (# 8) riba e lista di partido CDA den ciudad di Den Haag. Mandy: “Den Den Haag tin hopi hende di islanan di Caribe Hulandes ta biba. Mi kier duna e ciudadanonan aki un voz den e ciudad di Den Haag. E representacion di hende di Caribe Hulandes na Den Haag por ta miho. Ami kier yuda haya solucion pa tur e problemanan cu nos di Caribe Hulandes ta enfrenta na Den Haag”.
Retonan di den haag
E ciudad di Den Haag tin un serie di reto cu ta comun pa ciudadnan grandi na Hulanda. Algun di e retonan aki ta: con ta anda cu e caracter mas multicultural di e poblacion y stimula e integracion den comunidad Hulandes? Con ta atende cu e scarcedad grandi di vivienda, specialmente bou di hobennan? Con ta haci e ciudad mas sostenibel y limita e contaminacion di aire y awa? Tur esakinan(y otronan) ta temanan cu mester atende. Mandy Villasmil a scohe pa representa e comunidad di Arubianonan y habitantenan di islanan di Caribe Hulandes, cu ta un grupo basta grandi den Den Haag. Mandy mes ta splica cua ta e topiconan cu e kier concentra riba dje: “Mi lo kier yuda busca solucion pa e ciudadanonan di Caribe Hulandes cu ta biba na Den Haag cu e problemanan cu nan ta enfrenta. Pa haya vivienda cu ta un problema masha grandi mes den un ciudad grandi manera Den Haag. Tambe mi kier concentra riba e tema di integracion di ciudadanonan di Caribe Hulandes den comunidad Hulandes, cu no ta algo cu tur ora ta bay bon. Tin un serie di problema administrativo cu tin cu atende. Pero tambe cu e stap grandi cu hende ta tuma ora nan dicidi di sali di Aruba of un otro isla di Caribe, pa biba na Hulanda.”
Campaña
Campaña na Hulanda normalmente ta masha cortico y Mandy ainda ta studiando. Su tempo ta limita. E pregunta ta con por yuda Mandy den eleccion na juni na Hulanda for di Aruba. Mandy:
”Si nos tur lo por a bay Hulanda djis un dia pa vota lo ta bon. (Smile!!) Pero ya cu esey no ta posibel, por motiva amigo y famianan cu ta biba na Den Haag pa bay vota pa haya un representacion di un hende di Caribe Hulandes den gemeenteraad na Den Haag cu por traha mas di serca pa nan. Tambe por pidi Arubianonan cu ta biba na otro partinan di Hulanda cu si conoce hende cu ta biba na Den Haag pa bay vota pa un representante di comunidad di Caribe Hulandes. Corda cu den un “gemeenteraad” cu ta maneho directo di e ciudad por haci hopi mas pa hende, cu riba nivel di politica nacional.”
