E hoben studiante Arubano Emily Yarzagaray hunto cu un grupo di tres otro studiante, Sanne van Hellemond, Laura Aarts y Jessie de Hond a gana e “Innovatie prijs 2020” di Logopedie cu a wordo entrega den e congreso yama “Trots op Logopedie “ na Utrecht Hulanda.

Emily ta actualmente den su di tres anja academico, studiando Logopedie na Fontys Paramedisch Hogeschool na EindhovenHulanda.

Tur cos a cuminsa na February 2020 durante un concurso di klas. Emily hunto cu su grupo a bin na nan idea yama “De Active Logofloor” y a gana e mihor proyecto innovativo di nan klas. Na juni nan a competi cu e otro klas y atrobe nan idea a sali ganador di nan scol Fontys Paramedisch Hogeschool na Eindhoven. Despues di esaki Fontys a nomina Emily y su grupo pa e premio Innovativo 2020 organiza door NVLF (Nederlandse Vereniging van Logopedie en Foniatrie) na Hulanda.

Fin di September nan a hanja e bon noticia cu nan proyecto, hunto cu otro dos proyecto a wordo escogi como e mihornan di Hulanda. Den corto tempo nan mester a traha un video exponiendo nan idea. E grupo aki mes a traha nan video cu e ayuda di dos docente di nan scol Marjolijn van Gelder y Tim Gerbrands, tambe Dylan Yarzagaray cu a yuda cu e audio di e video y Christian Dorsiel cu a haci e final editing. Danki na tur e personanan menciona nan a logra nan meta.

Manera ta wordo splica den nan videohopi logopedistanan ta traha cu mucha y hopi biaha muchanan mester keda sinta na un mesa pa un tempo largo durante e tratamento, pa asina e logopedista por hasi diferente tareanan cu e mucha. Sin embargo esaki no ta algo fasil pa hopi mucha, nan ta cuminsa move, nan ta lanta para of cuminsa bula rond.

Hopi estudionan hasi a demostra cu muchanan ta sinja mas mihor si nan ta den movecion. Nan idea ta pa crea un vloer caminda e mucha nan por interact y asina no solamente trece e muchanan den movecion pero tambe yuda nan adelanta den nan terapia logopedico. Nos meta ta pa ofrece un pakete cu lo inclui un programa caminda e logopedista mes por escohe entre diferente tema y tarea y por combina esaki tambe cu diferente frase, palabra y sonido.

E video di e Projecto “De Active Logofloor” a wordo presenta diabierna pasa durante e Congreso cu a tuma lugar na Utrecht Hulanda.Na final di e dia nan a anuncia e ganador y e premio Innovador a bay pa “De Active Logofloor” . Nan a gana e premio cu un 49% di voto di e 900 logopedistanan cu a vota e dia ey. Cu e bunita suma di 2500 eurocu nan a ricibi awor e grupo aki ta bay sigi desaroya nan producto y asina trecele riba e mercado pa Logopedie.

Emily hunto cu su grupo ta di opinion cu danki na nan idea “De Active Logofloor” nan por laga mas mucha sinja y desaroya nan mes den un manera mas divertido durante e terapia nan logopedico. Hopi logopedistanan na hulanda ta super contento cu nan idea y nan ta spera di por hasi uzo di dje pronto!

Famia y amistadnan ta hopi orgulloso di e fantástico logro aki y ta desea Emily y su grupo hopi exito cu e desaroyo di nan proyecto ganador y nan futuro profeshon como Logopedista.