E strea di futbol Hulandes, Ruud Gullit lo bishita Aruba como orado invita na e evento PwC Masterclass Leadership 2016 cu lo tuma luga dia 8 di november awor.
Sr. Ruben Goedhoop a declara cu Gullit ta wordo recorda como un gran ex futbolista y un coach kende a yega di hunga na nivel profesional durante e decada di aña 80 y 90. Tambe el a fungi como capitan di e team nacional di futbol di Hulanda logrando e victoria den e Euro Cup na 1988.
E ta un logro cu nan por bin cu Gullit den e di seis edicion di PwC Masterclass Leadership cu lo tin como topico “Lead with Impact”. Sr. Goedhoop a declara cu for di dos aña pasa nan tabata trahando pa trece Gullit na Aruba y asina e lo por comparti cu e participantenan su experiencia como lider den mundo deportivo di futbol.
Den e caso aki e lo haci su presentacion den forma di interaccion caminda e participantenan lo por pregunta y e lo contesta nan libremente. Sr. Goedhoop a bisa cu e Gullit ta bon pa adapta su mundo y experiencia como leadership deportivo den mundo di business. Como futbolista y como coach e ta kere cu “preparacion” ta e clave pa bo riba exitoso riba bo actividad. E lo comparti con e tabata exitoso riba e dia ey cu e tabatin un wega importante.
Chris Tamjidi
Otro orador invita ta Chris Tamjidi kende ta co-fundador y director di Kalapa Hotel. E lo inspira e participantenan cu strategianan di e conocido buki “The Art of War” di Sun Tzu.
Sr. Greg Bronswinkel a bisa cu Tamjidi a dedica e ultimo decada pa traha riba desaroyo di un autentico liderazgo basa riba e filosofia transformacion personal. E lo papia riba e tema “lead with impact”, caminda e lo trece su disertacion riba e hendenan cu ta aspira di tuma funcion di liderazgo. E aspecto di liderazgo no lo keda den e parti conceptual, pero mas riba e tereno practico di tuma accion, segun sr. Bronswinkel.
E actividad aki ta full un dia for di 8’or di mainta cu e inscripcion ta cuminsa te cu 5’or atardi. Sr. Goedhoop a declara cu nan ta sumamente orguyoso di organisa un biaha mas e evento aki duna un impacto na e participantenan den e forma di liderazgo. E Masterclass aki ta habri pa tur hende di e Leadership Academy di PwC conhuntamente cu Universidad di Aruba, kende nan lo ricibi exclusivamente un certificado.
E evento aki ta dirigi tambe specialmente na directornan, managers y futuro lidernan local, pero tambe na nivel regional. Pa esun cu no ta miembro di Leadership Academy di PwC mester paga pa nan participacion.
