Despues cu a introduci un aerolinea di Brazil, GOL Airlines y cu intencion di expande den mercado Brasileño, Autoridad di Turismo di Aruba, A.T.A. a tene diferente reunion na Brazil den luna di juli.

E delegacion di A.T.A., consistiendo di Ronella Croes CEO di A.T.A., Jordan Schlipken Croes A.T.A. Area Director LATAM, Jo-Anne Meaux-Arends, Aviation Business Development Executive di AAA, y Carlos Barbosa di A.T.A. Brasil.

Segun A.T.A a informa den un comunicado di prensa, pa e periodo actual (YTD) juni 2024, e mercado Brasilero a aumenta cu 33% compara cu e mesun periodo den 2023. Segun strategia di diversificacion y enfoke riba segmento di High Value, A.T.A. tin como meta pa aumenta e mercado Brasilero cu 40% den 2025 compara cu 2024. Loke ta trata e mercado general di Latino America, e meta ta pa amplifica e presencia di Aruba den paisnan di entre otro, Argentina, Brasil, Chile, y Peru.

Den esaki, ta premira cu e aerolinea Brasilero lo hunga un papel crucial den logra e meta aki banda di conexionnan existente di Avianca cu vuelonan directo a traves di Bogota, Copa Airlines cu vuelo directo a traves di Panama, y LATAM Airlines cu vuelo directo via Lima.

Durante e siman, e delegacion a reuni cu esnan cu ta domina benta di biahe aki na Brazil. Mayoria ta socio existente y ta mira e potencial pa expande e mercado. Esakinan a inclui CVC Corp, Agaxtur, Orinter, BeFly, Viagens, AbreuTur, Decolar. Tambe a reuni cu Aeropuerto di Guarulhos y cu COPA Airlines cu a transporta 45% di esnan cu a bishita di Brazil na aña 2023. COPA, A.T.A. y AAA lo sigui traha di cerca cu otro pa expande e mercado.

Puntonan di atencion den e reunionnan aki a inclui: strategia, actualisacion di e producto Aruba, colaboracion na termino corto y largo y kico ta beneficioso pa e isla.

Pa stimula e oportunidad di expande e mercado A.T.A. lo inverti mas den promocion general pa crea conscientisacion referente Aruba, lo inverti den e mercado conhuntamente cu GOL y lo traha mas di cerca cu esnan cu ta bende biahe den e mercado. Inversionnan den “advertising” lo subi mas cu 50% e aña aki compara cu 2023 y den aña 2025 compara cu 2023.

E luna aki, A.T.A. hunto cu Aruba Airport Authority a anuncia e introduccion di un vuelo directo entre Sao Paulo y Aruba, destacando e crecemento den e mercado aki pa turismo di Aruba.

Durante introduccion di e vuelo, Carlos Barbosa di A.T.A. Brasil a enfatisa y elabora riba e impacto positivo di vuelonan directo, e importancia di e ruta nobo aki, y e relacion di termino largo entre Brazil y Aruba. Brazil ta un di e mercadonan primario na Latino America pa Aruba, cu expectativa pa crece cu 40% na 2025, compara cu 2024.

Durante un discurso, Ronella Croes CEO di A.T.A. a enfoca riba e strategia pa cu atrae bishitantenan di “High Value”, importancia di diversificacion den e contexto aki y cu esey crecemento di mercado Brasilero cu a conoce un crecemento promedio anual di 14.7% entre 2011 cu 2023. Tambe a resalta e hecho cu e Brasilero ta un di e mercadonan cu ta gasta mas na Aruba durante di nan vacacion y esaki entre otro ta haci di Brasil un mercado clave. “Nos ta keda subraya e importancia di e mercado aki pa Aruba, cu ta conta cu un estadia promedio di 6,3 anochi. Segun estudio di VISA di 2023, e bishitante Brasilero ta conta cu un patronchi di gasto di 843 dollar pa dia. Cual ta nifica cu Brazil ta bira e segundo mercado cu mas ta gasta na Aruba.”

“Despues di 39 aña den e mercado, oficina di A.T.A. LATAM tin como meta pa Aruba bira e destinacion

preferi pa e bishitantenan Brasilero”, a añadi Jordan Schlipken Croes, Area Director di A.T.A. Latino

Tocante Aruba Tourism Authority (A.T.A.)
Desde 1 di januari 2011, Aruba Tourism Authority ta opera como un entidad ‘Sui Generis’. Un organisacion independiente den e esfera publico. Aruba Tourism Authority ta fungi como ‘Destination Marketing and Management Organization (DMMO)’ y ta responsabel pa uni interes turistico entre socionan local e internacional. A.T.A. ta pone hopi enfasis riba e modelo di “High Value-Low Impact” cu ta para pa un balans entre aumenta e balor economico di e bishitante, posiciona Aruba como un pais desea y sostenibel, y posiciona Aruba como lider di desaroyo como un destinacion. Cu meta pa sigui mantene esfuerzonan den linea segun e balanse menciona, y logra aumenta entrada pa medio di calidad di turismo en bes di e volumen cu nos destinacion ta ricibi. Capacidad di carga ta sigui ricibi atencion di parti di A.T.A.