Manera ta conoci, tin diferente proceso cu migrantenan tin cu cumpli pa por bin na Aruba na momento cu nan kier biba y traha akinan; den esey DIMAS y DPL ta cumpli un rol hopi importante.
Pa cu esaki, prome minister Evelyn Wever-Croes diabierna di siman pasa, ora cu Gabinete Wever-Croes II a bira conoci, a sigura cu e vision cu nan tin ta cu pa stranheronan y pa e departamentonan aki lo mester ta transparente pa tur hende. El a señala cu nan kier traha pa Aruba, na unda cu mester di e departamentonan aki pa funciona lo mas alinea posibel cu otro.
“E exito di Aruba su recuperacion ta bay ta den desaroyo economico”, segun el a sigura. El a agrega cu ora nan a analisa tur e trabao cu ta wordo haci riba tereno di desaroyo economico, un di e problemanan ta e aspecto di permisologia.
Tur persona cu a haci un peticion tin cu haya un contesta sea si of no y esey ta e parti riba cual nan ta bay enfoca, segun el a declara. “Alinea e procesonan eynan, specialmente den dos departamentonan aki pa ta mas alinea na otro, kico ta maneho di gobierno”.
Di e mesun forma, el a informa cu na e momentonan aki Aruba tin cifranan di desempleo halto loke ta influencia e maneho migratorio y cu si mañan tin e desaroyo cu nan ta buscando y tin mester di importa mas mano de obra, esey lo influencia otro tipo di maneho migratorio. Pero na e momentonan aki, e prome cos cu ta bay pasa ta cu e maneho mester bay den e mesun linea y trata di acelera e proceso pa esunnan cu ta haci un peticion.
“Pasobra ora cu bo ta tarda, ora cu bo no tin claridad con un proceso ta cana y den ki fase un peticion ta, bo ta haya cosnan intransparente ta tuma luga. E ta un reto grandi y den esey nos tur lo yuda e minister pa logra e metanan aki”, Wever-Croes a finalisa.
Ley di castigo pa abuso sexual di mucha
Un di e pedidonan cu comunidad tin pa e proximo gobierno di Gabinete Wever-Croes II tin relacion cu ley pa loke ta trata casonan di abuso di mucha.
Den e conferencia di gobierno aki, prome minister Evelyn Wever-Croes – cu algun tempo pasa a manifesta cu ta bay cambia e ley aki “den seis minuut” – a señala cu segun el a compronde, durante e ultimo añanan aki nan a pasa tur e leynan cu mester a wordo pasa pa aumenta e castigonan.“Pa loke ta trata abuso sexual, specialmente abuso sexual di menor”, el a specifica.
El a sigura cu nan a introduci castigonan mas halto, nan a introduci e diferente forma riba con e casonan aki por wordo informa pa asina por cuminsa tuma accion; pero “tin trabao pa haci ainda riba e tereno ey, definitivamente y esey lo tin nos prioridad” , Wever-Croes a sigura.
