Storing den area di Savaneta tabata debi na cabelnan subteraneo cu a faya

Mirando cu area di Santa Cruz, Balashi, Pos Chiquito, Savaneta y vecindario a experiencia interupcion di coriente dos dia continuo, N.V ELMAR a dicidi di tene un conferencia di prensa pa asina splica comunidad kico a sucede y e ultimo desaroyonan cu ta tumando luga den sector aki.

Jonathan van der Linden (Department Head Underground Cables), Eldrick Celaire (Supervisor Planing & Projects y Engineer), Frank del Campo (Representante di MPR), Spencer Paul (Representante di MPR), a comparti informacion na comunidad ayera merdia unda Van der Linden a sigura cu diadomingo ultimo rond di 10.30pm alarma a drenta den e sistema di comunicacion di ELMAR indicando un storing den area di Balashi, Savaneta te cu Pos Chikito.

Nan a manda un grupo di supervisor cu tabata na warda pa cuminsa core riba e ruta di cabel y asina purba identifica kico e storing tabata ta, isola esey y establece e coriente.

Pa 12.40 di marduga di e siguiente dia, nan a logra reestablece coriente completamente den e area ey segun loke van der Linden a informa.

E causa inicial tabata un splice di un cabel cu a faya na unda cu for di dialuna nan tabata coba y ayera mainta nan a logra ripar’e. Esaki ta ubica na banda di Isla di Oro.

Na mesun momento, dialuna anochi specificamente 9.52pm tambe un otro storing a surgi den mesun area, incluyendo Santa Cruz unda lamentablemente door cu diadomingo nan mester a coy un tiki carga extra y pas’e riba un otro circuito, esey a causa cu otro cabel no por a carga y el a faya.

“Nos ta bezig haciendo un investigacion dicon e storing aki tabata asina mas grandi y esey nos ta bay mitiga lo mas pronto posibel,” van der Linden a sigura.

Banda di 11or di anochi di dialuna ultimo nan a logra reestablece coriente completamente y ayera mainta nan tabata drechando e di dos cabel pa asina ey nan tin tur cos normalisa back.

Igualmente a informa cu e cabel ta subteraneo (bao tera) loke ta nifica cu nan no por a premira e dos storing aki.

Di su parti, Eldrick Celaire a conta e proyectonan cu nan ta haciendo den e parti di e grid full rond Aruba, incluyendo e parti di unda tabatin storing dos dia pasa, vooral e parti di San Nicolas.

Celaire a bisa cu nan ta reemplasando e cabelnan existente cu tin su añanan pero cu ainda ta funciona, nan ta riparando cu e grid y demanda di coriente ta creciendo y nan tin cu reemplasa y haci e cabelnan aki di un capacidad un tiki mas grandi.

Tambe den e diseño, nan ta purba strategicamente di conecta diferente stacion cu otro, reemplasando stacionnan tambe cu ekiponan mas nobo pa asina ora tin un power failed of un fayo den nan grid, nan por restaura e coriente hopi mas lihe di loke ta posibel, pa nan tambe como empleado tin ekiponan mas sigur y pa na ora di un mantencion riba un di nan stacion of ekipo, nan por pasa e demanda riba otro cabelnan cu ta hopi mas facil cu nan no ta bay overbelast nan cabel.

“Esaki ta e idea di mas grandi di e tres motibo di pakico nos ta haciendo eseynan, actualmente si nos ta ripara na Zeewijk, nos ta traha un stacion temporario na banda, nos ta pasa tur cabel riba e stacion temporario aki, despues nos ta bay basha e edificio y bin cu ekipo nobo, pa despues pasa tur cos back. Esey ta un manera cu nos ta bezig den e plan y otro manera tambe ta cu e edificio existente por drech’e y hinca un ekipo nobo den dje. Esaki ta e plan cu full rond Aruba nos lo kier haci incluyendo e area di Pos Chikito, Savaneta. Jammer cu nos no ta yegando pa haci tur cos den un solo shot pero mester bay den fase pa nos molestia menos cliente posibel. Pero den e mundo di coriente, no por evita nada na 100%.” Celaire a bisa.

Tocante e pregunta si e cambio aki tambe lo trece cune interupcion di coriente na momento di haci e trabaonan corespondiente, Celaire a bisa cu nan ta avisa e barionan cu ta bay perde coriente pero tin biaha, manera e storing cu a sucede dos dia pasa, cu nan ta pasa cabel riba otro pa isola stacion y haci mantencion pero e otro cabelnan por haya un fayo “pero esey no ta den nos man, nos ta haci nos best di load e cabel mes lo menos posibel pero toch por bin algun fayo.”

Te aworaki, nan cabel ta suficiente pa wanta e load existente e cual ta subiendo, pero te ainda nan cabel ta wanta e capacidad hasta si lo pasa mas load riba e cabel.

Nan tin plannan pa termino cortico y termino largo pero e trabaonan mester wordo haci den fase pa por logr’e, segun Celaire a declara.

Den e parti di planificacion nan a ripara cu den area di hotel, Palm Beach y Alto Vista e load ta crece y demanda cu peticion pa capacidad a bira hopi mas halto, “antes un cas normal den area ey ta pidi 10 of 15 KVA y aworaki nan ta pidiendo casi tres biaha mas entre 30 cu 50 KVA. Nos ta compronde cu den e parti di Airbnb e airconan ta keda cendi henter dia y tin otro negoshinan cu ta pidiendo mas demanda den nos grid y nos ta teniendo na cuenta cune, Celaire a menciona.

Nan ta haciendo inversion pa tene un capacidad mas grandi y opcion di cabel extra pa si den caso, tin un power fail, e meta ta pa e pueblo lo no wordo afecta.”

Riba e pregunta si tin algun barionan cu tin mas riesgo cu otro, el a sigura cu no tin un bario cu tin mas riesgo cu otro, e cabelnan tin e capacidad pa tur bario y solamente e cosnan cu no ta den nan man, por ehemplo, cabelnan subteraneo, ta algo cu nan no tin control riba dje “esey mi ta wak mas tanto ta e risico y den temporada do yobida, cu lamper cu ta bay bin aworaki, tambe esey ta un riesgo halto pa e liñanan cu ta riba overhead,” el a finalisa.