Desde ultimo weekend Mundi Health Cafe a habri porta di manera preliminar. Aunke e cafe ta habri oficialmente proximo diahuebs, e hoben propietario Tristan Nedd- di 22 aña a tene un soft opening pa wak e recepcion di comunidad pa e cafe nobo. Nos a sinta cu e entrepeneur hoben pa asina haya un bista mas amplio riba e storia di e desafio nobo cu e hoben a tuma pa su mes.

Despues di un fin di siman bastante ocupa pa e personal di Mundi Health Cafe, su propietario– kende tambe ta un videografo a elabora mas riba e manera con e hoben a yega ta habita cu su concepto e sitio historico di Nicolaas Store, despues cu Fundacion Museo Arubano tabata buscando pa basta tempo un persona apropia pa e espacio.

Concepto di e hoben ta bira realidad

Mientras clientenan tabata explora e menu cu ta enfoca riba cuminda saludabel, sr. Nedd a splica con el a wordo inspira pa su famia kende tempo cu e hoben tabata chikito a cuminsa cu nan empresa na San Nicolas. Sr. Nedd a conta nos con e spirito empresario semper tabata parti di su famia y mes semper tabata kier a cuminsa cu su mesun negoshi. Specificamente den San Nicolas mirando cu e hoben hunto cu su famia ta di e region y e personalmente tambe kier hiba su districto pa dilanti.

E manera con a yega na tin su cafe den e sitio historico tabata cu e fundacion cu ta encarga cu e edificio unda e museo di comunidad lo bay muda dentro di un par di luna a tene un solicitacion habri pa personanan por presenta nan concepto. Pero despues di haya un cantidad di mas o menos 30 idea, e fundacion ainda no tabata completamente convenci, segun sr. Nedd.

Cuminda saludabel den San Nicolas

Ora cu e hoben a presenta su concepto na un empresario den San Nicolas, esaki a bay conecta esaki bek na e fundacion despues di a wordo convenci pa e hoben. Loke a resalta ta cu a enfoca riba e parti di trece cuminda saludabel, segun e hoben ta conta nos. Esaki compara cu proposicionnan di habri un luga cu ta bende pastechi por ehempel, a crea un espacio pa e hoben por amplia mas riba su concepto y ehecuta esaki. Particularmente sr. Nedd kier a trece e mensahe di come saludabel na San Nicolas pasobra no tin hopi cultura di come saludabel. Mirando cu ta na cada skina tin cuminda manera johnny cake cu ta yen di azeta, e hoben a pensa cu esaki ta algo cu ta haci falta den e districto.

Pa e recetanan e hoben a haya hopi conseho y ayudo por medio di su famia, specificamente di su primo kende tin experiencia den cushina. Pero tambe su wela kende conoce hopi receta di antaño. Un cliente durante nos bishita a elogia e side dish di batata dushi cu a wordo sirbi hunto cu su wrap. ‘E ta smaak manera mi hogar, e ta haci mi nostalgico’, ta loke e cliente a expresa despues di a caba su cuminda.

‘Hopi hende no ta kere cu bo por lanta un negoshi como hoben’

Aunke e hoben por conta cu e apoyo di su famia, segun sr. Nedd hopi persona no ta kere cu hobennan por ta doño di nan propio negoshi. “Loke mi a mira ta cu tin un mentalidad di tene hende abou.” Esaki segun e hoben no ta algo cu a logra stop su proyecto, pero si a crea algun inconveniencia den e proceso pa lanta su negoshi. Particularmente pasobra cu e sosten di cierto persona e hoben no lo tabatin mester di busca un prestamo pa cuminsa cu e negoshi. Sinembargo sr. Nedd ta consciente cu hopi negoshi ta bay e caminda di pidi prestamo, pues e no tabata contra esaki. Pasobra al fin y al cabo, e hoben actualmente tin su negoshi y a mira un soft opening exitoso, cu persona drentando constantemente durante weekend. Despues di a logra e prome stapnan pa bira un entrepeneur, e hoben a conta nos con algun persona te hasta a expresa cu e ta un inspiracion pa hobennan cu soñonan grandi. Sr. Nedd mes ta agradecido na su famia y tambe na esnan manera FMA y propietario di Charlie’s Bar kende a kere den su concepto. Su persona ta spera cu mas hoben haya inspiracion pa habri nan propio negoshi, no obstante e obstaculonan ni comentarionan cu nan ta haya eyfo.

Plannan pa amplia mas riba e concepto

Pero despues di a cuminsa cu e negoshi– cual oficialmente lo habri riba proximo diahuebs– e hoben a conta nos riba e manera cu ta bay amplia e concepto den futuro tambe. Nos a tene un combersacion riba tur e posibilidadnan cu lo por tin pa e hoben no solamente bou dak di Nicolaas Store pero tambe den otro edificionan na San Nicolas cu no ta wordo uza actualmente. E hoben a conta nos con por ehempel semanalmente nan lo bay toca muziek di artistanan local na e cafe pa asina trece un ambiente dinamico na Nicolaas Store.

Mas cu claro eventualmente e museo di comunidad lo bay habri riba di dos piso di Nicolaas Store, cual lo trece cu ne tambe un otro dimension. Pero e hoben a conta tambe con famia Nicolaas historicamente semper a uza e edificio pa diferente metanan. Durante su historia ademas di sirbi como un vivienda pa e famia e edificio tabata e sitio di diferente tienda.

Di e manera aki e hoben lo kier amplia e concepto mas y trece diferente elemento hunto. E forsa cu e hoben tin no ta solamente bin di su mes, pero tambe ta di esnan cu ta duna apoyo. Particularmente pa e generacion di hoben cu ta dispuesto pa colabora cu otro, manera ta wordo refleha tambe den e personal di e cafe.

Sr. Nedd ta spera cu por medio di su negoshi lo por atrae mas persona pa bishita San Nicolas, mirando como e hoben tin pasion pa su districto cual e ta considera como ‘un di e luganan mas bunita cu mi conoce’.

Potret den grupo cortesia di Mundi Health Cafe