Ultimo dianan nos por ta testigo di un ‘blame game’ amplio unda e diferente actornan a haci un esfuerso grandi pa convence prensa local di nan razon, y di e fayonan di e otro banda. Ministro encarga cu salubridad publico no a keda atras y ta critica e fundacion SOGA, cu ta propietario di e edificio di hospital. E critica ta encera e malcontento di e mandatario cu e avancenan den e proyecto di renobacion y ampliacion di hospital. En principio por comprende e iritacion di e mandatario, pasobra publico en general tabata testigo di henter un novela di mal gusto cu e proyecto aki. Desde inicio, den fase di destaho caba e proyecto a percura pa un polemica completo, unda esun cu a ofrece un suma mas abao a keda rechasa.

Despues a bin e chasco di aña, no, di siglo, di e salanan di operacion cu ‘olimpicamente’ a lubida di incorpora den e plan… Tabata dificil pa kere cu ta pa kibocacion esaki a bay asina. Despues a bin e otro problemanan, manera e holor di diesel den e edificio pasobra e genionan cu a traha riba e diseño a lubida cu diesel ta hole… y fuerte. Nan a incorpora esaki den e edificio y te awe nos no a scucha un solucion definitivo. Hiba henter e unidad aki pafo di e edificio lo bay costa balente placa, naturalmente pa nos paga… atrobe. Despues a haya e incidente di e diesel cu a termina den Bubaliplas pasobra e tanki tabatin fayo; recientemente a bin e problema di e camanan cu falta…

Y cada biaha nos tabata haya loke nos a mira den e ultimo dianan aki, a base di e incidente di un tubo di awa di yobida cu a laga bay, cu consecuencia cu awa a yena den e unidad di prome auxilio. Den e ultimo caso aki SOGA y e contratista mayor, OHL Arellano, ta tira culpa riba hospital cu supuestamente a keda sin haci trabao di mantenimento den e parti abao di e sistema di canalisacion di awa di yobida cu ta hiba esaki te na Bubaliplas. Di otro banda, si e tuberia di salida aki tin un caida di 26 metro manera e ingeniero di OHL Arellano a declara, e lo mester por wanta un presion bastante halto, durante cualkier awacero torencial. Pero awor atrobe prensa mester tende tur e storianan aki pa nos, preferiblemente pa e actornan aki, saca e conclusion cu nan tin razon y e otronan no. Lo mas sensato cu por haci den e situacion aki ta: no kere ningun. Laga un ekipo tecnico independiente investiga e asunto y nos lo haya sa aki dos of tres aña, ora nan keda cla, if ever. Despues di tanto bochorno, ta di mas pidi pa nos mira solucion? Ta cuanto incidente mas mester bin na hospital, fuera di tur e otro problemanan andando, manera e nombramento di un director financiero, manera e escandalo den laboratorio, unda nan ta ‘bezig’ cu un ‘investigacion forensico’ cu aparentemente ta e palabra magico nobo pa investigacion cu ta dura asina largo, te ora tur hende lubida cu nan tabata haci esey…

Sin embargo, talvez nos mester cuminsa mira e asunto aki di un otro banda, di un tiki mas distancia. Sin cu nos ta bay mete den e asunto ta ken tin razon den tur e baina aki, no ta miho cu nos cuminsa puntra nos mes si e diferente directivanan envolvi den e bochorno aki, ta en berdad capaz y competente pa haci loke a yama nan pa haci? Por ta cu e problema ta sinta den e realidad di un comunidad chikito manera esun di nos, unda cada biaha cu mester busca hende pa yena puesto den e directivanan aki, ta keda completamente scur ta kico ta e criterionan a base di cual a haci un yamado riba un cierto persona pa e tuma encargo di un cierto responsabilidad? Pakico nos nunca ta haya e criterionan aki pa mira? No ta aki nos mester cuminsa?

Atrobe nos ta yega na e punto cu nos mester mira den direccion di gobierno: ta basta di papia di transparencia y otro palabranan bunita, y cuminsa cu introduccion di reglanan estricto di Corporate Governance, cu rekisito profesional pa cada puesto, y cu posibilidad di solicitud pa e ciudadano cu tin e capacidad necesario, y no limita reclutacion na e privilegiadonan di e partido na mando, e asina yama ‘hendenan di confiansa’ cu ta garantisa cu en principio nada ta subi caya cu e politiconan kier tene confidencial. Te ora naturalmente e diferente ‘hendenan di confiansa’ aki den diferente puesto cuminsa guera cu otro. E ora nan ta bin cerca prensa pa nos kere nan y no e otronan.

Tanten no ta bin un otro manera di traha, nos no ta mira nada ta cambia den e cantidad grandi di fundacion, empresa, y ‘sui generis’ cu ta parce mas un tremendo posibilidad pa recompensa hende cu na e momento clave a sa di expresa nan lealtad na e politico di turno. Tanten esey keda asina, nos ta keda mira e pleitonan aki na un nivel di mediocridad cu no por duna nos e calidad di maneho y administracion cu nos mester.