Ta ora pa Aruba realmente introduci cambionan structural den su sistema di belasting y bay mas den direccion di belasting indirecto. Y si ta posibel, hasta cuminza cobra belastingnan acumula den forma di tarifa di importacion. Esaki ta e ultimo serie di consehonan cu Raad van Advies a formula pa Gobierno pa yuda e pais sali di e crisis economico, pero tambe stimula desaroyo social na Aruba.

Gobierno ta traha cu e Comision Recuperacion y Innovacion cu a produci e rapport ‘Reposiciona e belanan.’ Raad van Advies ta di acuerdo cu mester enfoca riba recuperacion economico mas lihe posibel, pero pa logra esaki, mester tuma pasonan concreto y haci cambionan fundamental. E momento pa e reformanan ta awor. Bon Dia Aruba a enfoca riba e diferente consehonan formula pa Raad van Advies y un structura di belasting nobo ta uno crucial.

Raad van Advies, den su intencion pa sostene e proceso pa yega na un model social-economico resiliente, a traha diferente conseho riba su propio iniciativa.

E consehonan ta deliberadamente segun tema pa duna suficiente informacion y tambe duna un bista riba e problemanan.

E sistema di belasting di Aruba

E sistema di belasting cu ta inclui belasting directo y indirecto, ta relativamente fragmenta y compleho. Ademas, investigacionnan ta mustra cu cumplimento cu belasting ta hopi abao tambe. Servicio di Impuesto di Aruba, SIAD, pa motibo di accesibilidad di instrumentario, sistemanan di trabao y organisacion, y pa motibo di e fragmentacion, no por cobra belasting na un forma eficiente y tampoco suficiente.

For di hopi tempo ta existi e proposito pa atende e ineficiencia y problemanan pa medio di reforma di belasting, cu mester conduci na un structura balanza, moderno y simplifica.

A pesar di tur e intencionnan, Raad van Advies a bisa cu no a bin (casi) ningun cambio den e structura, y cu pa via di e deficitnan den gobierno, a introduci belasting nobo y a hisa e tarifanan existente. E presion di belasting, of mihor dicho, e presion di gastonan colectivo como tal a bira hopi mas visibel. E situacion aki y e desaroyonan pa loke ta e clima di bida, maneho di empresa y inversion como no tal no ta bentahoso.

Recomendacion

Raad van Advies a formula un serie di recomendacion encuanto e forma con por mehora e structura di belasting y cu esey, ta purba fortifica e posicion social-economico di Aruba. Algun ta recomendacion cu a yega di duna den pasado caba, pero mirando e perspectiva dificil debi na Covid, a amplia y refina e consehonan.

Di belasting directo pa indirecto

Lo por surpasa e falta di cumplimento cu pago di belasting directo, entre otro e belasting riba entrada, como consecuencia di limitacion di ehecucion y mantencion pa gobierno, reformando e structura di belasting di tal forma cu e enfasis lo cay riba e esfera di belasting indirecto, cu ta nifica cu ta paga belasting ora di consumo. Esaki ta aumenta e cumplimento, teniendo na cuenta cu e circulo di personanan cu no ta paga belasting directo ta mas grandi cu ta conoci. Motibo pakico e ta mehora cumplimento ta pasobra belasting riba consumo ta mas practico ora ta trata ehecucion y mantencion, y ta promove e clima di negoshi y inversion.

Ademas, Raad van Advies ta mustra tambe riba e necesidad pa modernisa e sistema di belasting den e esfera directo, di forma cu e ta mihor acopla na e contexto di sociedad actual y futuro, por ehempel, basa riba un economia digital.

Particularmente e structura di belasting riba entrada ta anticua y compleho pa loke ta su ehecucion. Tambe lo mester pensa riba cambia e tarifanan den e ambiente di belasting directo. Cu tarifa di belasting directo mas abao por proyecta mas crecemento economico.

No mas para den rij tur aña pa plachi di auto

Eliminacion di belasting riba vehiculo y boto di motor y hinca nan den accijnzen. Incorpora BBO, BAVP, y BAZV den un belasting indirecto, incluso tarifa di importacion.

Tur e belastingnan fragmenta, manerea BBO, BAVP y BAZV y impuesto di importacion, mester keda incorpora den un belasting indirecto no cumulativo, na entrada di frontera. Ta mustra riba practica unda e fragmentacion aki ta trece gasto administrativo adicional pa empresarionan. E inclusion di impuesto di importacion hunto cu BBO, BAVP y BAZV cu ta acumula hunto, ta un recomendacion fuerte di Raad van Advies.

Tur aña ta saca plachi di number di auto nobo y ta hiba un forma di pago di belasting cu ta ineficiente y ta tuma mucho tempo. Hasta e recogemento di e numbernan pa esnan cu ta paga e belasting no ta practico. Gobierno ta haci gastonan administrativo y material innecesario, cu ta inclui producto y servicio. Aumento di accijns riba gasolin y diesel ta un solucion mas eficiente unda ademas ta garantisa practicamente 100 porciento di cumplimento.

Belasting riba ganashi

Limita e erosion di impuesto riba ganashi, y mehoracion di e clima di empresa/inversion

Raad van Advies ta kere cu mester para e erosion di e base den e esfera di belasting riba ganashi. E asina yama posibilidadnan pa kita mas gasto posibel, for di e punto di bista di simplificacion di e sistema, mester keda limita. Pero si di un manera con lo por cobra belasting unicamente riba ganashi real.

Na e mesun momento, mester crea estimulonan di belasting basa riba costo, pa stimula y promove inversionnan. Raad van Advies ta pensa por ehempel riba kita e inversion for di e pago di belasting riba ganashi. Esaki lo por yuda crecemento economico y desaroyo.

Zegelbelasting mester bira parti di historia

Eliminacion di e provision riba divisa y hinca esaki otro caminda ademas di e eliminacion di belasting di zegel.

Mirando e entrada relativamente limita di e compra di zegel, y for di punto di bista di simplificacion di e sistema, Raad van Advies ta kere cu mester por elimina e tipo di belasting aki. Pero en bista di otro tipo di belasting cu a elimina, ya cu Gobierno a bisa cu nan ta produci relativamente poco entrada, manera successiebelasting y belasting riba benta publico, ta consehabel tambe pa elimina otro belasting cu no ta produci mucho, por ehempel e belasting riba medio ambiente riba autonan di huur.

Renobacion y fusion di e ley di Douane actual

Pa hopi tempo caba ta trahando riba un ley di douane nobo, segun e modelo di islanan BES. Si logra termina y implementa e ley aki mas lihe posibel, lo hisa eficiencia tanto cerca douane mes como cerca importadornan.

Pa loke ta belasting di transaccion, esaki tambe mester cambia, segun Raad van Advies. Aruba ta grandemente un economia di importacion. E pagonan na exterior na proveedornan den exterior ta hacie caro pa empresarionan local. E pago di prestamo na financiadornan internacional tambe ta bira caro. Como tal, e belasting riba transaccion lo baha e rendimento pa inversionistanan stranhero. Pa stimula economia, gobierno lo mester incorpora e tipo di belasting aki den e grupo general di belasting indirecto, por ehempel e grupo di BBO, BAZV, BAVP hunto cu invoerrechten.

Reorganisacion di SIAD y Douane

A pesar cu a implementa diferente aplicacion di belasting, ainda nan ehecucion di parti di SIAD no ta optimal. Raad van Advies ta conseha pa restructura of reorganisa SIAD di un otro manera, pa asina por yega na un implementacion mas eficiente di e leynan di belasting y di Douane. Esaki lo nifica un rendimento mas halto pa Pais Aruba.

E organo di consulta mas halto di Aruba ta kere cu un biaha mas mester usa islanan BES como ehempel unda e organisacion di e aparato ta mas chikito, sin cu e ta stroba e trabao di servicio di belasting y Douane.