Stock poco poco elevando na Wall Street

Stock Mericano, petroleo y otro mercado financiero rond mundo a logra recupera un tiki despues di nan caida historico un dia prome, entre speransa cu Merca y otro gobiernonan rond mundo lo duna mas ayudo pa un economia debilita pa virus.

Inversionistanan tabata contento cu e recuperacion ayera, pero no tabata pretende cu esaki ta fin na e cambionan enorme den e mercado, cu a trece e S&P 500 dialuna na su pio dia desde crisis financiero na 2008. Stock tabatin saltonan mas grandi cu esaki den ultimo simannan, unicamente pa e fondo cay atrobe.

Sinembargo, speransa tabata crece cu e esfuersonan grandi di sosten di autoridadnan global cu mercadonan tabata sperando lo por ta na caminda, sikiera pida pida. Presidente Mericano, Donald Trump a bisa cu su administracion lo pidi Congreso pa un excension di impuesto riba payroll y otro medidanan rapido pa yuda protege contra malesa di COVID-19, cu a pusha aerolineanan pa cancela vuelo y a pone Italia cera henter e pais.

Na Hapon, un task force cu prome minister a set up a aproba un pakete di $4.1 biyon pa negoshinan mediano y chikito.

Alec Young, managing director di investigacion di mercado global na FTSE Russell, a bisa cu ‘mercadonan no ta intercambia riba bon of malo, nan ta intercambia entre miho of pio’. “Mi lo spera autoridadnan haci lo posibel pa reduci incertidumbre”, el a bisa. “Esaki lo por ta e oportunidad pa hacie.”

Crudo Brent, e standard internacional, a aumenta $2.89 of 8.4%, na $37.25 mientras crudo Mericano di referencia a aumenta $1.89 na $32.98. Prijs di azeta a cay 25% dialuna entre un guera di prijs entre e productornan, cu ta sacando mas petroleo di tera maske e demanda ta cayendo pa motibo di virus.

Mayoria di hende ta recupera di novel coronavirus. Segun Organisacion Mundial di Salud, persona cu malesa modera ta recupera den alrededor di dos siman, mientras esunnan cu un malesa mas severo mester di tres pa seis siman pa recupera. Na China continental, unda e virus a explota inicialmente, a diagnostica mas di 80mil persona y mas di 58mil te awo a recupera.