Stimami Sterilisami: Problema di cacho y pushi riba caya a aumenta exponencialmente den e ultimo tres aña

E problema di cacho y pushi riba caya ta uno cu pa hopi tempo diferente organisacion ta lucha pa elimina y un di e organisacionnan aki ta Stimami Sterilisami. Crescenzia Biemans di Stimami Sterilisami ta elabora tocante con e campaña di sterilisacion ta bayendo, kico ta e metanan cu tin pa yuda supera e problema aki y con nan ta trahando pa logra e metanan ey.

Biemans a splica cu desde 2016 mas di 37 mil cacho y pushi a wordo sterilisa. Aworaki e campaña di Stimami Sterilisami ta bayendo hopi bon. El a sigui splica cu loke nan ta haci ta subsidia parti di e costo di e sterilisacion pa e bira mas accesibel pa mas hende por sterilisa nan mascota. Pero aworaki loke nan ta wak ta un crisis grandi di hopi hende cu ni si e costo di sterilisacion ta por ehempel 50 florin nan lo por sterilisa nan mascota y esey ta e problema mas grandi.

El a indica cu e problema aki ta bira mas intenso na e momentonan aki cu e ley pa mascotanan drenta Merca ta bay cambia entrante 1 di augustus. Esaki kiermen cu cachonan cu ta menos di seis luna bieu no ta bay por drenta Merca.

El a splica cu loke e organisacion a haci pa haci nanalcanse mas grandi ta cu nan a uni cu e campaña Paws Uni y a haci un donacion di 53 mil florin pa paga e costonan medico. Ademas, el a agrega, cu nan ta bay paga e subsidio pa diferente actividad di sterilisacion cu ta bay tuma luga dentro di e campaña den diferente area di e isla, cu ta areanan di menos recurso cu di otro manera no lo por haci uso di e subsidio.

Biemans a remarca cu e plan ta pa sterilisa alrededor di mil cacho y pushi den un luna y mey.

Ademas di esey, el a sigui splica, nan a uni cu AWAA (Animal WelfareAlliance Aruba) y den esaki loke nan ta haciendo ta basicamente pagando e fee di sterilisacion, cual pa nan ta 25 florin, pa tur mascota cuminsando di juli te cu fin di aña, y despues lo evalua si proximo aña lo sigui cu e subsidio aki.

“Nos meta ta pa yuda full e poblacion di Aruba cu nos subsidio, e organisacionnan di rescate y aworaki tambe pa yuda e organisacionnan via Paws Uni y AWAA,” Biemans a remarca.

Pa loke ta trata e cifranan, si tin aumento of caida durante añanan den e cantidad di cacho y pushi cu ta riba caya, el a indica cu nan a wak un cambio basta drastico entre 2016 y 2020. Durante e periodo aki nan a wak cu ainda tabatin cacho y pushi riba caya, pero e tabata menos, pero despues den 2020 ora cu mester a stop pa motibo di COVID, casi tur donors no tabata por a haci contribucion pasobra durante Covid no tur hende tabatin e budget.

Esaki a causa cu e numbernan a crece exponencialmente, cual el a señala tin sentido pasobra cacho y pushi ta reproduci exponencialmente. Na momento cu nan a cuminsa back na fin di 2021, nan a wak cu tabatin un peak atrobe, cual ta birando un tiki menos, pero, segun el a remarca, nan ta leu di unda nan mester ta, cual ta e rason cu ainda e organisacion ta existi.

Biemans a resalta cu e meta ta cu idealmente e leynan ta na luga pa asina nan por sigura cu no tin cacho y pushi riba caya pasobra tin tanto doño di mascota responsabel cu e no lo ta ni un pregunta, pero esey no ta e caso.

“Kico nos a purba di haci ta sterilisa mas mascota posibel y tambe nos ta keda crea conscientisacion y traha cu gobierno pa asina nos por purba di pone tur e leynan na luga pa sigura cu e situacion stop di pasa, pero lo mas importante ta cu nos mester aplicacion di e leynan. Por tin 100 mil ley skirbi, pero si no tin un polis of un instancia cu ta sigura cu e leynan ta wordo adheri na dje, e ora no ta bay tin un cambio mes,” el a enfatisa.

Paws Uni ta un iniciativa di Zoey Conijn, presidente di Luna Foundation Aruba. Biemans a splica cu e motibo pakico nan a tuma e decision di uni cu Paws Uni ta door di Conijn.

“El a bin cerca nos y e ta esun cu ta organisando e campaña di Paws Uni y no solamente e kier pa nos drenta den e areanan di menos recurso y sterilisa e mascotanan, pero e ta bayendo na cada cas, papiando cu e doñonan, splicando nan dicon nos tin cu hacie, sigurando tambe cu despues di e sterilisacion tin e cuido. Esey ta locual ta importante pa nos, cu nos por sigura cu despues e doñonan no ta gewoon busca mas puppies, cu nan no ta cuida nan cacho- y pushi e manera cu mester ta,” el a indica.

Biemans a remarca cu esey ta e problema den comunidad, cu hende no ta realisa cu un mascota ta parti di un famia y cu e mester di cuido manera cu cualkier otro miembro di e famia. “E ta un responsabilidad cu bo ta tuma y no ta djis un bestia cu ta na bo cas cu no ta importa kico ta pasa cu nan. P’esey nos a uni cu Zoey pasobra esey ta e parti importante, no solamente sterilisa, pero tambe bay educa e personanan,” el a agrega.

Por ultimo Biemans a gradici cada instancia, entidad, organisacion y/of persona cu a brinda nan apoyo durante añanan, den e caso di donacionnan. El a menciona tambe cu minister Ursell Arends ta trahando riba loke ta bay bira e ley nobo di bienestar di bestia y el a resalta cu e ley cu aworaki ta den proceso ta bay tin un cambio hopi grandi y e ley ta bay wordo reforsa den e manera cu mester ta.

“Nos ta djis purbando di tur manera posibel pa mitiga e sufrimento di cacho y pushi riba e isla aki. Esey no ta e unico problema cu nos tin, nos tin diferente hopi problema, pero esaki ta uno cu ta un refleho di nos comunidad y nos kier sigura cu nos por busca un solucion y cu hendenan tin e realisacion cu bestianan ta parti di nos famia,” el a finalisa.