Stichting Trampolin Trabou ta un fundacion cu ta coach persona cu limitacion, cu tin e capacidad pa drenta den area di trabou, pa asina tur persona por sinti nan mes inclui y ta activo den comunidad.
Lionel Rumnit, job coach di fundacion Trampolin pa Trabou a splica cu pa cliente cu limitacion, prome tin cu tene un combersacion den cual e persona y e famia ta yega na un idea y evalua si ta pas pa por ta den un trabou.
Eynan e proceso ta cuminsa ‘instroom’, caminda e persona cu limitacion ta cuminsa cu e habilidadnan basico pa e training, conoci como ‘soft skills’. Ora nan ta bon prepara, nan ta sigui pa e ‘doorstroom’, cu ta e etapa den cual nan ta bay stage.
Esaki por sucede na un negoshi of organisacion. Ora nan ta cla cu e stage, ta busca un trabou cu nan por ta fiho. Segun Rumnit e meta di Trampolin pa Trabou pa prepara y yuda duna guia pa e clientenan por haya y mantene e trabou.
Trampolin pa Trabou tin 5 aña trahado, sinembargo a cuminsa wak e fruto di e fundacion. “Bo no ta realisa cuanto a pasa. Nos a haya mas di 30 cliente, mayoria ta na pia di trabou. E personanan aki ta traha cu amor, feliz, nan no kier tene man na halto y tampoco ta warda pa hende duna nan placa.”
Rumnit ta expresa cu su clientenan kier wordo aprecia y balora, ‘nan kier traha cu orguyo’. E ta bisa cu esey ta duna nan forsa pa sigui y ta habri caminda pa otro.
E ta bisa cu un cliente feliz ta duna un ehempel. Awo cu evento di celebracion di 18 Di Maart tin actividad den cual nan cliente lo ta trahando. “E amor cu nan tin pa nan trabou, e interes, e gana di kier traha y haci nan trabou… Nan merece un chens den comunidad pa e potencial cu nan tin.”
Rumnit ta bisa cu e proceso aki no ta nada facil, pa motibo cu ta keda reto di famia, cu nan tin miedo cu hende ta bay haci algo malo cu nan yiu cu tin limitacion. Tambe tin e berguensa di nan yiu, maske ‘esey no mester’. E ta bisa cu e persona cu limitacion ‘kier y por’.
Cu esey e ta bisa cu no mester stroba nan. Tin biaha e mayor ta esun cu ta stroba e persona cu limitacion di sali den comunidad. Sinembargo Rumnit ta bisa cu nan tambe ta ser humano.
E ta bisa cu e proceso di tin confiansa cu e mayor of e famia, pa por laga e mucha, por sigui cu e guia di Trampolin pa Trabou. “Hopi caso ta inspiracion den fase, cu ta bay wak mas dunado di trabou lo bay habri porta pa cliente y nan ta descubri e talento cu e clientenan tin.”
Den un caso tin trahado cu limitacion di autismo, e ta trahando den Hyatt Place. A papia cu e general manager, ken a expresa su contento di con e persona aki ta enfoca riba su trabou y ta haci’e cu amor. Esey ta un ehempel cu a menciona cu ta duna nan orguyo.
Pa esaki e ta bisa cu hende tin cu tuma nan, pa asina nan mes por experencia locual e persona cu limitacion ta haci. “Nos ta biba den un isla y ta facil pa hende punta dede. E dolor di famia cu hende ta pasa den dje ta haci cu nan kier cera nan yiu of no duna espacio.”
Esey por crea cu e persona cu limitacion tambe por cay den depresion. Rumnit ta conseha e famia, mirando cu hopi biaha nan kier solamente proteha, pero ta lubida cu nan tambe kier un identidad, nan kier ta social. Pues mayor mester tene na cuenta cu nan tambe tin derecho pa un bida social y no mester tene nan separa di sociedad.
“Ami lo conseha pa mayor wak kico tur tin rond na Aruba, nan no sa cuanto hende of fundacion cu tin nan pa yuda nan. Respaldo tambe tin cliente cu ta wordo trata y cu ta forma parti di comunidad y nan mester e chens pa traha”, el a bisa.
Rumnit a splica cu tin persona cu ta bon studia, pero tin problema psikiatrico, cu tambe mester soluciona nan problema. Kisas no por ta 100% productivo, pero nan por aporta pa comunidad. Djis ‘mester pensa out of the box’ pa guia ‘coaching’ y siña nan e caminda pa cana. Di e forma aki nan ta motiva otro tambe pa sigui siña y no keda pendiente di e ‘handicap uitkering’; sino pa stimula pa bay traha y kier e yudansa cu nan por.
Si tin hende cu kier tin mas informacion of kier sa mas di stichting Trampolin pa Trabou, pa cualkier pregunta nan por bishita nan pagina di Facebook, of por pasa bishita e luga y wak.
Nan ta wak si e persona ta cualifica, pa nan tuma e persona y wak cu den algun luna nan ta haya chens di stroom uit pa despues haya un trabou. Tambe kier comparti awo cu 18 di maart ta na caminda, nan tin waiter y catering disponibel pa traha pa evento.
“Cualkier fiesta cu tin nan por yama of acerca pa nan por tin nan waiter cu ta cla pa yuda. Pa nan busca algo diferente den catering. Tin cushina, y henter e menu riba Facebook pa comparti. Tin opcion vegetariano y no vegeteriano pa cualkier fiesta cu ta”, el a bisa.
Nan ta recorda cu Stichting Trampolin pa trabou ta pa gana e curason di tur hende y disfruta di nan servicio. Ta pidi pa no cera pashent, duna nan un caminda pa cana y pa nan sa cu tin chens y por aporta pa comunidad.
Por yama na 5829485 / 5920096 of e-mail trampolinpatrabou@gmail.com.
