Ayera tardi, Stichting Reclassering en Jeugdbescherming Aruba a organisa e Art Exhibition & Silent Auction Fundraising cu e fin di recauda fondonan pa nan proyecto di re-integracion, Conectando.
Ivan Poulina, coordinador di proyecto Conectando, a afirma cu esaki ta un proyecto cu ta consisti di hobennan entre 16 pa 25 aña cu a cay den man di husticia, cu no ta bay scol y cu tampoco tin algo positivo pa haci den nan tempo liber.
Poulina a comenta cu Closing Event Auction tabata un exposicion di pintura cu e hobennan a traha na man den nan terapia creativo, cual a cuminsa desde 12 di december te ayera. Bou guia di artista local Vanessa Poulina, e hobennan a desvela nan pintura pa e publico cu a asisti, como tambe pone un bid silencioso pa despues bende e miho pinturanan.
Asina mes, Poulina a informa cu e hobennan aki ta haya un training di habilidadnan social, cu nan ta haya durante henter proyecto un biaha pa siman. Tres dia pa siman nan ta haci un trabou y den esaki ta siña hermentnan di disciplina, structura y tambe e ofishi cu nan ta bay haya di parti di e persona cu ta guia nan den e proceso.
Ademas di esey, Poulina a duna di conoce cu ta siña e hobennan pa mantene activo y saludabel, den cual e terapia creativo ta inclui.
Tocante aña 2019, el a menciona cu desde cu e proyecto a cuminsa na januari, e hobennan ta participa den e programa aki. Despues cu nan a termina cu nan training y nan trabou, nan a haya un certificado di e programa, cu tin un duracion entre 3 pa 6 luna.
Pa finalisa, Poulina a duna di conoce cu na aña aki nan a yuda 38 hoben pa e parti di habilidadnan social y den e proyecto mes nan a yuda 25 hoben.
Mirando esaki, el a haci un yamado pa haya apoyo di instancianan gubernamental, NGO’s, institutonan social of sector priva, pa yuda Stichting Reclassering door di brinda e hobennan un luga pa por participa den proyectonan.
