Pa presidente di Stichting Rancho, Clifford Rosa, tin un antes y un despues, ora cu e fundacion aki a wordo funda oficialmente awe 10 aña pasa. E tempo aya e fundacion aki a wordo funda hunto cu un exposicion na Museo Arkeologico.

Rosa a bisa cu e bario historico aki tin su retonan socioeconomico, pero e stigmatisacion cu Rancho tin a baha considerablemente. “E aspecto di e nomber di Rancho cu tabata un nomber cu awe ainda bo ta wak’e den su aspecto negativo, a haya un espacio tambe di progresa y duna un miho cara,” el a declara na Bon Dia Aruba.

E por sinti un cambio den Rancho, pero tambe nan ta bin hayando comentarionan cu ta haya aspectonan positivo den e bario aki, meymey di tur e problemanan social cu por tin. “Ami por bisa cu mi ta mira algo prome y despues di e fundacion…” el a declara.

Crisis di Covid-19.
Sinembargo den cuadro di nan 10 aña di existencia como fundacion, nan por mira actualmente den e crisis di e pandemia di e coronavirus/Covid-19, ‘un golpi y un sorpresa no agradabel,’ segun Rosa.

Nan ta un fundacion cu a wordo lanta den un di e barionan mas pober di Aruba, y nan ta mira e problematica aki di e efectonan di e virus hopi di cerca. Pero tambe cu lamento cu como fundacion nan no por haci practicamente nada. Mirando cu debi na nan situacion como fundacion, semper nan ta rekeri di fondonan cu nan ta haya di instancianan pa proyectonan cu nan ta presenta, of donacionnan cu nan por haya.

Pero lamentablemente den e ultimo siman, ora cu e crisis aki a inicia, nan a cuminsa pensa kico ta pasando pa asina nan por ahusta nan mes. Den nan prome decada di existencia nan ta purba di educa mas nos comunidad den diferente aspecto. Rosa a referi cu den nan statutonan tin diferente puntonan y un di nan ta un mehoracion socio-economico di e bario y di cada persona, si ta posibel. Aworaki nan ta mira cu e aspecto socioeconomico aki ta den su momento mas dificil.

Documentario.
Prome cu Rosa a asumi su responsabilidad como presidente di stichting Rancho, ya caba e tabata activo den su bario natal. Antes e tabata traha como boluntario di bario den e area di Playa Pabao.

Cada 20 di april ta un fecha cu tur aña desde cu Stichting Rancho a cuminsa, cu nan ta para keto un rato y trece algo dilanti. Pero e biaha aki debi na e circunstancia di e Covid-19, nan ta bay haci uzo di e facilidad di mundo digital pa presenta dialuna pa 6’or atardi ora local, un documentario cu nan a traha cu hopi esfuerso via nan Facebook-page:Stichting Rancho y tambe via nan website: www.stichtingrancho.org

E ta un proyecto riba herencia cultural inmaterial di e bario di Rancho tocante barco miniatura crioyo cu nan a haya fondo dor di Comision Nacional di Unesco na Aruba. Pa medio di e documentario aki, stichting Rancho su deseo ta pa comunidad duna sosten tambe riba e tema aki cu ta un herencia cultural inmaterial no solamente di nan bario, sino di Aruba henter.

“Practicamente nos ta subi riba tarima cu no ta solamente pa Rancho nos ta traha. Pero practicamente nos ta trahando pa Aruba,” Rosa a bisa.

Como presidente di e fundacion aki, Clifford Rosa y sigur otro miembronan di e directiva, ta sinti nan mes hopi orguyoso di por conmemora 10 aña di existencia di stichting Rancho. Un fundacion cu a wordo lanta sin animo di lucro y cu un sistema di boluntarismo ehemplar.