Recientemente ariba nan pagina di Facebook Stichting Rancho a anuncia cu nan lo ta cuminsando cu un iniciativa nobo, Rancho Cafe, pa yuda e fundacion sigui contribui na su obhetivonan y alabes yuda recauda fondo pa e fundacion.

Cu e iniciativa aki, Rancho Cafe, esnan cu pasa bishita e fundacion por disfruta di un copi di koffie na e sede di e fundacion, pero na mesun momento por cumpra e productonan local, second hand y obranan di arte cu e fundacion ta ofrece. E entrada di e benta aki ta wordo inverti directamente den operacion y proyectonan di e fundacion.

Manera ta conoci desde 2021 Stichting Rancho su oficina ta situa na Visstraat 1 den Oranjestad. Na e localidad aki tin un espacio publico conoci como Rancho Plaza y e plaza aki ta wordo usa regularmente pa Stichting Rancho pa organisa diferente actividad social y cultural pa comunidad di Rancho y henter Aruba por disfruta. E eventonan aki ta contribui tambe na e metanan di e fundacion.

E fundacion ta depende grandemente di donacion cu nan ta ricibi for di tanto personanan local como tambe di bishitante cu ta haci donacion di material, manera entre otro obranan di arte, producto-, paña y bukinan di segunda mano. Durante e ultimo tempo e fundacion a bin ta acumula tur e materialnan aki y aworaki nan a crea un espacio den e edificio di nan sede cu lo fungi como Rancho Cafe pa asina un y tur por pasa y disfruta di un mainta agradabel den centro di ciudad.

Rancho Cafe lo ta habri pa publico den oranan di mainta y durante e orario aki tambe personanan cu ta desea di haci donacion di cualkier material, paña segunda mano, obra di arte y buki, entre otro, por pasa libremente pa laga nan donacion.

Un di e proyectonan grandi di e fundacion ta e celebracion di 200 aña di Oranjestad. Preparacion pa e celebracion aki a cuminsa algun aña atras caba y e aña aki capital di Aruba ta celebra su 200 aña cu el a wordo funda.

En conexion cu e proyecto aki Stichting Rancho a cera acuerdo pa haci uso di edificio Nikky Habibe pa crea un espacio multi-funcional y creativo unda e publico por siña mas tocante e Historia di Oranjestad y celebra 200 aña di e ciudad.

E fundacion ta trahando pa tin un evento dia 24 di juni y 24 di juli pa cuminsa cu e celebracionnan y e evento grandi mes lo tuma luga dia 24 di augustus 2024.