Stichting Rancho ta celebra 12 aña di existencia

Stichting Rancho ta celebrando awe 20 di april 12 aña di existencia y en conexion cu e celebracion aki presidente di e fundacion, Clifford Rosa, a splica durante un conferencia di prensa kico e fundacion lo haci pa celebra e fecha aki y el a elabora tambe e trabaonan cu Stichting Rancho ta haciendo y lo haci den futuro.

Rosa a splica cu ya caba ta un tradicion cu cada aña ariba dia 20 di april como fundacion nan ta trata di trece e tematica nobo cu nan lo bin cune pa e proximo aña, e proximo periodo di trabao cu nan ta bay eherce.

Stichting Rancho lo toca diferente tematica, y un di nan, segun Rosa a indica, ta duna danki na e sostenedornan, boluntarionan, medionan di prensa y na e comunidad cu ta brinda nan e apoyo y cu ta aplaudi e bon trabao cu Stichting Rancho ta eherce.

“Pa mi e ta un orguyo cu nos ta cumpliendo 12 aña conscientisando, educando nos comunidad di Aruba, pero mas bien tambe hayando nos educacion cu nos tin mester den e region aki. P’esey nos ta trece un biaha mas e punto hopi importante cu tin di haber cu intercambio cultural y comercial entre Aruba y La Guajira”, el a remarca.

E tema di intercambio cultural y comercial ta uno importante, Rosa a subraya, y nan tin añanan caba ta enfatisando e importancia bon comunicacion, bon relacion, bon logistica den e region di Caribe pa asina por papia ariba seguridad di alimento. “Nos tin añanan ta pidiendo e atencion y mi ta kere ta bolbe crea e momentum pa nos bay traha ariba esaki mirando cu nos ta bay tin bishita di personahenan di La Guajira”, el a agrega.

Pa celebracion di 12 aña di existencia di e fundacion, Rosa a menciona cu nan lo tin algun artista cu lo presenta awe nochi pa asina duna un contexto un biaha mas di e importancia di e intercambio cultural y comercial entre Aruba y La Guajira.

Rosa a splica cu nan lo tin un programa extenso cu diferente invitado. E celebracion ta cuminsa mainta cu un desayuno caminda, Rosa a remarca, nan ta bay ta reflexionando un biaha mas como bestuur, boluntario- y sostenedornan hunto cu algun invitado ariba e trabao cu e fundacion ta haciendo y unda nan ta bayendo.

Anochi nan lo tin presentacion y algun orador. Un di e oradornan ta e rector nobo di Universidad di Aruba, Viola Heutger. Otro invitado special for di La Guajira ta Sra., Maria Isabel Cabarcas cu lo duna un presentacion academico ariba e importancia di cooperacion entre e region y sigur for di La Guajira pa e area di Caribe.

Sra. Jocelyn Croes tambe lo t’ey presenta y lo trece pa dilanti e tema di SDG. E tema di SDG, segun Rosa a señala, ta uno importante mirando cu e fundacion ta den e capital di Aruba y SDG #11 ta toca e tema di desaroyo y ta papia di un sistema circular, mas moderno pa atende cu e parti di urbanisacion (urbano planning).

Lo tin tambe un presentacion di e tradicion, un ritual cu e hende muhenan Wayu ta haci na momento di inicia un actividad di suma importancia, cu tin di haber cu e herencia y cultura y tradicion, cu ta un topico importante pa e fundacion. Stichting Rancho tambe lo toca e tema di buskeda informacion, unda por bay pa busca informacion, con ta busca informacion y tur esaki bao di e capa di celebracion di 200 aña di Oranjestad.

Rosa mes tambe lo duna un presentacion di Kooplieden Kwartier. El a splica durante e conferencia cu pa proximo aña e fundacion ta bay intensifica e conscientisacion tocante e celebracion di 200 aña di Oranjestad y e tematica di Kooplieden Kwartier ta importante pa e gran celebracion di 200 aña di e capital di Aruba.

“Kooplieden Kwartier ta un area hopi importante pa e desaroyo di Oranjestad y ariba esey nos ta bay educa e comerciantenan cu tin den e area di Oranjestad, Whilhelminastraat pa asina nan ta mas consciente di locual ta e parti historico y asina e inversionnan por wordo haci un poco miho. Nos ta desea tambe pa mira mas inversion den Oranjestad mirando cu nos ta papiando aworaki di proteha nos herencia, pero proteha Oranjestad cu ta e capital di Aruba”, Rosa a indica.

Rosa a menciona tambe cu Fundacion Rancho ta un co-fundador di Dutch Caribbean Heritage Platform, un plataforma hopi extenso pa atende cu tur e informacionnan cu ta rekeri na e seis islanan di Caribe Hulandes y pa medio di e plataforma aki si tin mas pregunta of mas sugerencia pa informacion nan ta ricibi esakinan nan sigur pa medio di e intercambionan cu nan ta haci.

“Nos a caba di bin for di un conferencia na Boneiro caminda cu Dutch Caribbean Heritage Platform a laga nos firma un intencion nobo y e intencion aki ta pa nos por yega mas cerca na e sistema cultural y informacion di archivonan cu tin na Hulanda”, el a agrega.

Pa loke ta trata informacion, specificamente informacion di historia, Rosa a enfatisa cu tur informacion ta valioso y pa e motibo aki nan ta kere den e parti di media y documentacion di tal informacion, y pa e mesun motibo aki e parti di informacion oral ta hopi importante pa desaroyo. “Nos ta pidi pa haci mas pregunta na famianan grandi pa asina tin un contexto di kico ta biba den cada historia familiar”, el a señala.

Rosa a menciona tambe cu awe 20 di april nan ta celebra un aña mas di existencia, na 2023 nan ta celebra otro aña di Fundacion Rancho pero ariba e dia ey nan kier pone un punto cardinal unda cu diferente instancia y departamentonan sa caba kico nan contribucion lo mester ta, pero tambe na sector priva.

Por ultimo el splica cu aworaki e fundacion ta dunando sector priva e oportunidad di pensa y bin cu ideanan dilanti mirando cu e celebracion no ta solamente di 200 aña di Oranjestad, pero e ta pa educa tambe comunidad di informacion historico y di gran balor pa Aruba por ta ariba e plataforma mundial.