Den luna di April tabata tin un reunion entre Aruba Ports Authority, Poundwise y Piscadonan di Waf’i Rancho, caminda a presenta un acuerdo riba papel entre e partidonan envolvi pa continua cu e desaroyo di embeyecemento alrededor di Waf’i Rancho.
Señor Clifford Rosa, presidente di Stichting Rancho, ta comenta cu aunke acceso ta cera ta publico cu vehiculo, e piscadonan si tin acceso. “Si e piscadonan mes si tin acceso na e pier, esey no ta niun problema”, Sr. Rosa a bisa. “E piscadonan a haya awa, nan tin awa pa laba nan boto awo caba, dus si tin desaroyonan positivo pa e piscado”.
Na December di 2020 Stichting Rancho a manda un carta pa gobernador cu e peticion pa para temporalmente e trabounan alrededor di e pier pa asina bay back na mesa y clarifica algun punto pa tur partido.
“E carta pa gobernador si nos a haya respuesta caminda gobernador ta manda puntra e minister encarga e tempo ey di infrastructura pa atende cu esaki”, Sr. Rosa a bisa. Pero di parti di minister no a ricibi ningun respuesta ariba e carta.
“Nos no ta haya cu e ta bayendo 100% manera cu nos ta desea, pero manera nos ta bisa, si e piscado ta contento, nos tambe ta contento”, el a bisa.
Sr. Rosa ta subraya cu e aspecto cu nan no ta di acuerdo cune ta cu “e conservacion di e parti historico cultural cu tin, ya el a disparce caba”.
“Aworaki, e beach, parkeerplaats a wordo traha riba dje. Pero semper nos lo keda cu nos punto di bista cu nos ta perdiendo nos identidad cultural historico di Rancho, cual ta e waf”, Sr. Rosa a agrega.
