Recientemente tabata circula informacion cu Stichting Rancho ta den proceso di muda, pero cu no tin un edificio nobo ainda pa establece e fundacion. Bon Dia Aruba a tuma contacto cu presidente di Stichting Rancho, Clifford Rosa, ken a confirma cu en berdad lamentablemente Stichting Rancho ya no lo tin un oficina cu pueblo di Aruba por pasa bishita.

Contestando e pregunta kico ta e motibo cu ta bandonando e localidad cu nan tabata den dje, Rosa a splica cu e prijs di huur e luga a aumenta, locual ta hacie dificil pa e fundacion por a sigui mantene porta habri na e localidad aki.

A puntra Rosa tambe si a duna un splicacion na e fundacion di e motibo cu nan dicidi di aumenta e prijs di huur, si e fundacion no por busca ayudo of subsidio pa yuda paga e huur y si e fundacion lo sigui cu su trabounan.

Rosa a splica cu a aumenta e prijs di huur pa motibo cu real estate tin un prijs comercial cu tur hende kier haya como entrada. El a indica cu Stichting Rancho semper a busca pa tin subsidio pa e parti operacional di e fundacion, pero no ya no ta logra sigui na e luga aki mas.

El a remarca cu a pesar di e ciere di nan oficina e fundacion ta sigui na bida pa eherce cierto actividadnan tradicional.

“Cumpliendo 15 aña dia 20 di april 2025, organisando Careda di Boto Miniatura riba 18 di maart 2025, conscientisa riba 16 di februari 2025 tocante Guera Mundial. Pero awe 4 di februari 2025 no tin espacio pa Stichting Rancho ricibi bishita di pueblo y publico en general,” el a splica.

Pa celebracion di 200 aña di Oranjestad Stcithing Rancho a habri un museo den Oranjestad, na e edificio Nikky Habibe, pero e edificio aki tampoco nan no por usa. Rosa a splica cu na e edificio aki e contract a vence dia 31 di december 2024 y nan ta eynan ainda, pero no por haci nada tampoco. El a indica cu nan a warda e cosnan di e fundacion den e edificio en espera di kico futuro tin pa Stichting Rancho.

Pa agrega na e tristesa cu tin, el a informa cu dialuna mainta, 3 di februari, nan a encontra e baki di sushi cu nan a usa pa haci e luga limpi na candela. El a splica cu e container tabat’ey desde diamars y pa diahuebs e tabata yen caba, y lastimamente dialuna na a encontra cu e sorpresa cu a pega e container na candela.

Stichting Rancho ta conoci pa diferente proyecto, actividad y sobretodo pa su trabou y dedicacion den e area di herencia cultural di Aruba. Ademas e fundacion tin un bon relacion cu Reina Hulandes. Durante añanan, Rosa a splica, Aruba a bin ta perde hopi cos y esaki, el a menciona, ta motibo di e gobiernonan.

El a expresa cu, mirando cu aworaki tin e proceso di formacion di gobierno andando, Stichting Rancho lo desea di mira un ministerio di Enseñansa, Cultura y Ciencia hunto pa asina atende cu multiple asunto di pais Aruba.