Clifford Rosa presidente di Stichting Rancho a conta Bon Dia Aruba cu ‘Fiesta Tipico den Bario Rancho’ ta bay ta nan ultimo Marshe di aña 2022 unda nan ta bay celebra e Dia Internacional di Migrante e proximo diadomingo18 di december den un ambiente ameno cu gruponan tipico.

E dia aki e caya Visstraat number 1 na Oranjestad ta bay tin ambiente for di 5or di atardi te cu 10or di anochi cu e presentacion di e gruponan Sonido di Antaño, Tradicion Musical, Ivy y su grupo, Tipico Ayo y Stima Mi, ademas di esey tambe lo tin cuminda pa bende, nan a scoge e fecha 18 di december mirando cu semper nan ta haci un actividad tocante Dia Internacional di Migrante segun e kalender di Unesco.

“Cu esaki nos ta clausura nos ultimo actividad di aña 2022 caminda nos ta pone atencion na e dia aki na nos Marshe unda tur cos ta local cu hendenan local pero tambe na nos gruponan tipico di Aruba unda lo tin diferente bandanan tipico cu ta bay deleita cu nan musica e ambiente di fin di aña”, Rosa a expresa.

Igualmente el a reitera cu esaki tin como obhetivo pa migrantenan di Aruba por celebra e dia aki “pa nos manera cu tur aña nos ta pone gruponan di gaita, pero e aña aki nos ta bay cu e gruponan tipico di bario y nos ta trece nan pa haci un fiesta celebrando e dia aki y e clausura di Marshe Rancho, nos ta espera pa hendenan sali y disfruta un dia diferente” Rosa a sigura.

E actividad ta bay tuma luga na Rancho Plaza unda Rosa a splica cu esunnan cu ta desea di haya un tent pa bende nan productonan por tuma contacto na e number di telefon 563.9388 y 562.8352.

Esaki ta un iniciativa cu Stichting Rancho ta organisa unda Rosa a informa cu nan no a haya cooperacion di otro instancianan cu ta atende cu migracion manera UNHCR of HIAS, “aworaki di nos banda tur aña nos ta para keto y nos ta haci nos actividad pa conscientisa riba e tema, pero tambe pa trece e hendenan hunto pa nan por haya un momento pa socialisa”.

Rosa a menciona cu Stichting Rancho lo continua cu nan actividadnan dia 16 di januari nan lo anuncia nan plannan pa 2023.

Pa Rosa e aña 2022 “nos por mirel’e como un aña di sobrevivencia den e espacio nobo na Visstraat pero tambe e relacionnan cu fondonan internacional manera Mondriaan Fonds cu nos a haya di ultimo, pero tambe e 200 aña di Oranjestad cu ta e logo cu a bira oficial caba, lo cual ta un logro y ademas, nos tin un area nobo pa bay explora den dje cu ta e area ‘turistico’.

Conversatorio tocante sclavitud pa comunidad

Rosa tambe a informa tocante un conversatorio cu ta bay tuma luga dia 15 di december, esaki ta trata tocante un topico cu manera Rosa a expresa “comunidad no ta papia di dje y nos ta organisa e conversatorio aki riba e fecha di 15 di december mirando cu ta e dia di Reino y tambe ta yama ‘Statuutdag’ cu a wordo crea na 1954 pa e leynan e tempo ey”, el a bisa.

Di esaki, el a splica cu nan kier toca e tema y evalua con Aruba ta para aworaki na aña 2022 tocante desaroyo di sclavitud, esaki ta bay tuma luga for di 6.30 di atardi te cu 8or di anochi na auditorio di Rancho unda Rosa ta bay ta presente como orador y tambe Sr. Artwell Cain PhD, ex-director di NiNsee (National Institute of Dutch Slavery, Past and Legacy) tambe ta bay forma parti di esaki.

E organisacion aki ubica na Hulanda ta esun cu actualmente ta esun cu ta papiando tocante sclavitud y e reparacion cu estado lo tin cu haci cu paisnan of islanan cu ta cay bao e sistema colonial di Hulanda.

Pa e motibo aki, nan ta invita comunidad pa uni na e conversatorio aki dia 15 di december pa asina ey como comunidad por dialoga riba e tema aki, el a comenta cu esaki no ta dirigi solamente na esunnan profesionalnan sino tambe pa comunidad cu mester papia mas y bin hunto pa intercambia informacion di sclavitud.