Unabes cu Stichting Rancho a termina su tayer di barco di miniatura cu ayudo di UNESCO, nan a dicidi di organisa un actividad den cuadro di Dia di Betico, mañan 25 di januari.

Presidente di e fundacion, Clifford Rosa, a bisa na Bon Dia Aruba cu ainda e inscripcion ta habri pa tur hende amante di e actividad aki, y cu tin boto crioyo of esun modifica, of cualkier modelo di boto miniatura cu bo por tin. El a invita pa saca nan y bin participa den e competencia aki cu lo cuminsa registra pa 9or di mainta, y mey ora despues bay dilanti, nan ta cuminsa cu e carera.

El a informa cu e participantenan ta sigui aumenta, pues e interes ta grandi. E ta tuma luga pariba di Wilhelmina Park, na altura di e Cas di Gobernador. Esun cu mester drecha nan bela, Rosa a bisa cu den nan Centro di Actividad Rancho, nan tin bela disponibel, y tambe nan ta cla pa cualkier otro ayudo cu bo tin mester di dje.

Igualmente tur interesa por registra caba na Centro di Actividad Rancho, ya cu e biaha aki nan lo bay tin bon premionan y regalo tambe. E costo pa ta un prijs rasonabel, mirando tur e gastonan envolvi rond di un actividad asina. Nan ta bay tin tres categoria: 30, 35 y 40. Na Bonaire den e ultimo regatta e categoria 45 a wordo introduci, y den principio e no ta descarta cu na Aruba tambe por pensa den e direccion ey.

El a bisa cu e actividad aki ta uno den un ambiente familiar, caminda nan tin bar y cushina bon surti y na prijs special. “Pa asina ey, nos tin un dia di famia band’i lama, caminda cu Aruba henter por pasa y admira e boto miniatura,” el a bisa. Tambe el a bisa cu nan ta buscando boluntario pa duna publico e ayudo valioso den e dia ey.

Historia maritimo.
Stichting Rancho ta bin haciendo esfuerso conhuntamente cu otro partnernan pa cierto herencia cultural material y inmaterial no bay perdi. Entre nan e tradicion aki relaciona cu e construccion y competencia di e boto miniatura.

E fundacion aki a gana un proyecto riba e tereno aki cu nan a entrega na UNESCO. Rosa a gradici e comision nacional di e instancia internacional aki na Aruba, mirando cu e ta considera cu e tabata un proyecto necesario cu tin di haci cu historia maritimo.

“Como fundacion nos tin un deber pa mehora nos sector di piscamento di e bario di Rancho. Pero tambe e parti maritimo cu ta masha importante,” el a bisa. Na aña 2020, e fundacion aki lo concentra mas riba e temanan aki y nan lo expone proyectonan cu tin di haci cu e parti maritimo.

Rosa a bisa cu e participacion di publico mañan lo ta un sosten pa e proyecto cu nan a caba di clausura di e tayer di boto miniatura. Di su banda, Ginelly Quandt kende ta coordinador di proyecto di e fundacion aki, a declara na Bon Dia Aruba cu e actividad aki lo sirbi di escenario pa clausura e proyecto cu nan a realisa hunto cu UNESCO. E instancia aki a facilita e fondo pa realisa e tayer di boto di miniatura cu asistencia di varios participante durante dos luna. Lo bay tin cuater participante den e actividad aki cu a caba full nan boto completo den e tayer aki, y nan ta bay pusta den e categoria di 30.

E tradicion maritimo ta un parti cu Stichting Rancho a compromete su mes, ya cu nan ta un bario historico di piscadonan, caminda nan kier sigui fomenta e parti di e desaroyo maritimo na Aruba. Segun Rosa, e echo cu bo ta participa den un competencia di boto miniatura cu bo propio boto, eynan bo ta refleha bo conocemento di e mundo maritimo y tambe di boto di bela.