Stichting Monumentenfonds Aruba kier pa comunidad henter uni na nan y asina explora e historia rico y e bunita arkitectura di e isla. Dia 15 di september proximo e comunidad di Aruba lo tin e oportunidad di bishita y drenta 13 monumento y edificionan historico den e area di Oranjestad.
E dia special aki ta bay ofrece un oportunidad pa bishita y siña tocante algun monumentonan y sitionan historico mas valioso di Aruba y tur ta bay ta habri gratis.
Pa prome biaha Stichting Monumentenfonds Aruba ta organisa e Open Monumentendag den colaboracion cu Stichting Nederland Monumentenland cu ta encarga cu Open Monumentendag na Hulanda. Na Hulanda lo celebra esaki durante tres dia largo pero na Aruba lo ta diadomingo 15 di September.
E publico lo por registra na e monumento di Casita Geel y for di akinan cuminsa nan recorido den Oranjestad y bishita e diferente Monumentonan, participa na actividadnan pa grandi y chikito cu e posibilidad di gana varios premionan manera Weekend stay, travel vouchers, sunset sails, dinners y hopi mas.
Entre 10 or pa 3or e monumentonan lo ta habri pa publico y di 3 or pa 5 or lo tin un evento di clausura pa entrega di premio pa e publico cu a participa na e diferente actividad y disfruta di e musica di e banda musical Tsunami.
Tur informacion lo ta obtenibel online via di e website y app di open Monumentendag y tambe lo tin informacion disponibel na e diferente edificio.
Lo por disfruta di entre otro baile y musica, workshop y actividadnan pa mucha, benta di artesania y cosnan tipico di Aruba, Instameets y competencia di fotografia di e proyecto di Lang Leven het Erfgoed, tournan exclusivo y hopi mas.
Pa e motibonan aki, Stichting Monumentenfonds ta invita comunidad di Aruba pa dal un keiro cu amigonan y famia, pa descubri e historia of simplemente disfruta di un dia diferente.
Si tin boluntarionan cu lo kier duna un man ainda por registra via di e website di arubavolunteers.org
