E falta di mas iluminacion riba e plaza dedica na e baluarte di nos cultura y co-autor di nos himno nacional, Juan Chabala (Padu) Lampe tambe ta un preocupacion pa Stichting Monumenten Fonds. Considerando cu den e bisindario ey, nan tin varios edificio monumental cu ta bay bou nan maneho.

Aunke e plasa aki no ta cay bou nan maneho, si nan tin varios monumento cu den pasado algun a bira victima di vandalismo. E fundacion aki ta doño di edificio cora conoci como ex hotel Colombia. Tambe di esun berde cu ta Standhuis y esun shinishi di Algemene Rekenkamer cu antes tabata biblioteca bieu. Pues den e area aki nan ta doño di e tres edificio monumental aki.

Directora di Stichting Monumenten Fonds, Anne Witsenburg a laga sa cu ya antes den pasado, nan a yega di trece dilanti nan preocupacion na gobierno cu e situacion di e plasa aki. Pero e ta haya cu esaki ta un situacion cu ta exigi un esfuerso y colaboracion di nan tur pa busca un solucion conhunto. Un solucion pa trece mas luz anochi y un tiki di sombra den dia. E fundacion aki ta spera cu nan por logra algo pa bin cu mas actividad den e area aki, ya cu esaki ta yuda nan monumentonan tambe.

“Nos ta dispuesto pa coopera cu gobierno y cu instancia concerni,” el a bisa.

Igualmente e ta haya cu mester evalua e situacion cu tin di haber cu nan edificionan mes. Por ehempel ora cu nan a bin cu e Plasa Padu, e edificio di Algemene Rekenkamer of Controloria General a perde su zona di parkeer. Aunke ainda nan no tin un plan concreto, pero eventualmente pa futuro nan por cambia e funcion di edificio ey, y lag’e mas habri riba e plasa. Por ta e tipo di cambio aki lo por yuda pa trece mas bida den e area aki.

Mantencion

Pa loke tin di haci cu trabou di mantencion, e aña aki Stichting Monumenten Fonds no tin proyecto grandi di mantencion, ya cu nan edificionan monumental ta den bon estado, asina su directora, Anne Witsenburg a declara na Bon Dia Aruba. Actualmente nan tin 15 monumento, 12 di nan ta edificionan y tres di nan ta obheto, manera e forno di calki na Rancho. For di nan fondo nan ta destina un parti substancial di dje pa trabou di mantencion. E suma ta varia, pero e ta alrededor di 600 mil florin pa aña.

Sinembargo, nan ta trahando ariba algun proyecto di mantencion mas chikito. Nan ta bay verf e dak di Nicolaas Store. Tambe nan ta verf e muraya pafo di edificio di famia Henriquez, unda ta situa actualmente Monumenten Bureau.

E trabou di mantencion specialmente den edificionan considera como monumento historico ta uno regular, casi constante. Pero el a aclaria cu no solo nan trabou ta limita pa haci mantencion so, sino cu maneho tambe di nan edificionan monumental.

Actualmente nan tin un edificio monumental bashi pa huur cu antes tabata e sede Utilities entre Monumenten Bureu y Museo Arkeologico. Entrante 1 di januari lo tin otro disponibel, ya sea pa oficina of negoshi. E ta e casita geel conoci como ex Aruba Bank of Museo Numismatico.