E prome seis luna di e aña aki tabata un periodo basta druk pa Stichting Monumenten Fonds Aruba. E directora di e fundacion aki, Anne Witsenburg, a bisa na Bon Dia Aruba cu nan ta contento di por a cuminsa cu varios proyecto. Un di nan mas visibel ta esun Uncle Louie Store na San Nicolas.

Edificio di Uncle Louis Store ta un proyecto cu pa basta aña nan tabata den preparacion, y aworaki nan a cuminsa cu e proceso di restauracion.

Restauracion na San Nicolas
Durante e ultimo añanan varios edificio monumental a wordo restaura na San Nicolas y nan a wordo destina como museo como un vision gubernamental pa e districto aki por bira uno autenticamente cultural.

Witsenburg a declara na e matutino aki cu semper nan tabata interesa den San Nicolas pa su importancia den henter historia di Aruba. “Manera semper historia a laga atras varios edificio cu awor ta un monumento,” el a bisa.

Como fundacion cu ta busca y destina fondo pa tipo di proyecto di restauracion asina, ya caba nan a yega di inverti hopi na San Nicolas, entre nan den restauracion di Nicolaas Store y tambe na Water Toren cu a bira dos joya di museo actualmente. Awor nan ta bezig cu Uncle Louis Store.

Tambe nan a yega di busca otro edificionan y historia rond di San Nicolas. For di Seroe Colorado te Cura Cabay, tambe den e area di Amsterdamstraat caminda e fundacion aki ta bezig pa inventarisa y evalua posibel proyectonan tambe.

“Nos ta kere cu no ta Playa so ta importante pa Aruba, sino ta Aruba henter,” el a bisa.

Igualmente nos monumentonan ta mas plama rond di Aruba compara, por ehempel, cu esunnan na Corsou cu ta mas centralisa na Willemstand. E fundacion aki ta purba pa tur nos monumento por haya e debido atencion y por ta den bista di tur hende.

Edificio Uncle Louis Store
Nan a cuminsa cu algun trabou caba na edificio monumental conoci como Uncle Louis Store, y manera e trabou ta bayendo, nan ta spera cu nan por keda cla cu e trabou di reconstruccion y restauracion di e edificio aki prome cu fin di aña. E edificio monumental aki lo bira sede di Directie Natuur en Milieu, y nan ta spera cu entrante otro aña e departamento aki lo por muda eyden.

Logicamente nan ta consciente cu nan ta trahando riba un monumento, pues nan no ta construyendo algo nobo, y eventualmente ‘nos por haya un par di sorpresa,’ el a declara. Pero e fundacion aki ta masha optimista cu nan lo por keda cla cu edificio monumental aki pa luna di december venidero.

Pareu cu e trabou di restauracion, tambe nan tabata hopi bezig cu un investigacion historico di e edificio aki. Nan a cuminsa investiga mas riba historia di e edificio mes, ken a traha den dje, ken tabata doño di dje y te hasta kendenan tabata e cliente di e negoshi aki. E proceso aki tambe ta bayendo basta bon.

Witsenburg a bisa cu un bes cu e trabou di restauracion keda cla, nan kier sali cu e historia di e edificio aki pa asina tur hende, tanto local como turista, por ta consciente dicon e ta un monumento.

Ya caba nan a cuminsa compila basta informacion di e poblacion di San Nicolas mes. E ta haci un yamada den general pa tur hende cu lo por tin informacion y tambe potretnan bieu rond historia of recuerdo di Uncle Louis Store pa comparti cu Stichting Monumenten Fonds Aruba. Riba nan pagina di Facebook e fundacion aki a pone varios potret cu ta mustra con e trabou di restauracion ta bayendo.