Ja Ik Aruba ta un fundacion cu tin como enfoke yuda e hobennan y hobennan adulto mehora diferente aspecto di bida, sobretodo nan liderasgo personal. Jalken Antonia, fundador di Stichting Ja Ik Aruba, ta conta Bon Dia Aruba di e meta di e fundacion, kico nan ofrece y e motibo pakico a tuma e decision pa lanta Ja Ik Aruba.

Antonia ta conta cu Ja Ik Aruba ta un fundacion cu ta existi pa cinco aña caba. E fundacion ta yuda hoben adulto y profesionalnan hoben siña mas tocante liderasgo personal, responsabilidad y tambe siña tocante e comportacion di un comerciante.

“Nos kier yuda nan stimula desaroyo di participacion laboral y social, preveni abandono di scol, pero tambe pa nan tin exito exterior y nos kier yuda nan semper haya un trabao. Pa mi ta importante cu e talento cu nos tin nos ta usa esey,” el a remarca.

E fundacion ta traha cu hobennan cu ta bay scol y hobennan cu ta drop out, entre 14 aña pa 30 aña di edad.

Antonia a sigui conta cu cuater aña pasa el a bin biba na Aruba. Semper e kier a duna back na e hobennan pasobra e ta mira cu e hobennan tin hopi talento, pero tin diferente cos cu falta y un di nan ta liderazgo personal.

“Mi ta wak cu hobennan tin talento pero nan ta cay afo pa motibo cu nan no sa con pa lidera nan mes. Nan no ta consciente suficiente di responsabilidad. Tin hopi hoben ta bisa mi kier esaki, ami kier esey, pero abo ta bay pe?,” el a enfatisa.

Pa e motibo ey el a lanta e Stichting Ja Ik Aruba, pasobra el a mira cu tin hopi hoben adulto cu no sa lidera nan mes y di su punto di bista e parti di liderasgo personal ta aspecto hopi importante.

Antonia tin su propio negoshi Ja Ik Academy cu ta specialmente dirigi pa profesionalnan cu cual e ta yuda companianan mehora nan productividad y nan rindimento. Di e programa profesional aki e ta uzando cierto hermentnan pa midi e potencial di e hobennan y con nan por lidera nan mes miho.

El a remarca cu den actualidad e ta wak un estilo di modern slavery na unda un hende ta na un trabao pa e placa, pero no pasobra e gusta e trabao. “Den esaki semper mi ta combina e teoria cu e practica y pa e motibo ey mi ta bishita diferente compania pa asina por haya sa cual comportacion, of cual etica di trabao ta rekeri na pia di trabao pa bo por ta exitoso,” Antonia a resalta.

“Un persona por caba e miho estudio, pero nan no tin e experiencia laboral ainda, dus nan no tin conocemento ainda ki eticanan laboral ta importante. Una bes bo sa mas di esaki hunto cu e sabiduria, cu esaki bo por logra bo meta,” el a agrega. Pa Antonia e parti di liderazgo ta bira mas y mas importante. “Mi ta wak con mundo ta cambiando y hopi biaha mi ta wak cu falta liderazgo. No solamente pa hobennan, pero hasta pa companianan,” el a subraya.

El a splica cu e programa tin tres grupo obhetivo. Prome nan a cuminsa cu alumnonan di SPO, cual ta bezig cune caba, tin e hobennan di Colegio Nigel Matthew na San Nicolaas y tin e grupo di drop outs.

Pa e grupo di drop out, el a sigui splica, e exito ta wordo midi ora cu nan tin mas conocemento di nan mes, con nan por ldiera nan mes pa logra nanmeta y e meta ta pa nan por haya un trabao, pa nan por bay back scol of si tin hobennan cu kier cuminsa nan mesun negshi, e fundacion tin e netwerk pa nan por cuminsa nan negoshi.

“Esaki pa nos ta kico ta importante, pero sobre todo bo ta bay haya sa unda bo ta trompica cu bo no ta logra bo metanan, kico ta zorg cu cada bes bo ta dal bo cabes na e mesun punto,” el a indica.

Pa e grupo di hobennan di scol e programa ta enfoca den orientacion di trabao, pa yuda nan den nan perfil, yuda nan cu nan liderazgo personal pa nan por caba nan scol y pa nan bay over, pero tambe, Antonia a agrega, pa nanpor haya sa “kico ta come y bebe na pia di trabao, kico e organisacionnan ta haya importante of ta rekeri pa nan bay traha na un luga pa nan tin exito.”

El a enfatisa cu esaki tambe por tin influencia riba e hobennan ora di tuma decision di kico nan ta bay studia y asina nan por wak kico ta fit pa nan of kico no ta fit pa nan.

Antonia a splica cu programa ‘In the Picture’ ta usa hermentnan pa midi nan perfil, nan impulso y con efectivo nan liderasgo personal ta. Esaki ta otro herment cu e ta usa y wak con nan ta desaroya nan mes.

E programa ta dura un aña durante cual lo bishita nuebe diferente compania, cu averahe cu ta bishita un bes pa luna un compania. Prome cu cuminsa bishita compania ta prepara e hobennan y tinun training tocante liderasgo personal y responsabilidad pa asina nan ta miho prepara ora cu drenta e comapnia.

“Esey tambe ta zorg cu hopi biaha e participantenan cu mi ta traha cu nan ta duna otro impresion na e compania. Nos ta enfoca ariba tur cosnan pa e hobennan duna un bon prome impresion,” el a resalta.

Pro ultimo Antonia a indica cu aworaki e fundacion ta buscando 20 hoben/hoben adulto cu ta drop outs entre e edad di 18 pa 28 aña cu no tin scol, cu no tin trabao y cu echt mester di ayudo. E programa ta completamente gratis, e unico rekesito cu nan ta puntra ta seriedad y compromiso di parti di e hobennan.

Pa mas informacion por bishita e pagina di Facebook di Stichting Ja Ik Aruba of yama na 7440625.